د ملګرو ملتونو سرمنشي آنتونیو ګوترش په یوه ناسته کې ویلي، په نړۍ کې کابو ۲۷۲ میلیونه ماشومان او ځوانان له زده کړو بې برخې دي.
رخشانه: هغه دغه څرګندونې تېره ورځ (چهارشنبې د لړم ۱۴ مه) قطر کې د نړیوالې ټولنیزې پراختیا په دویمه غونډه کې مطرح کړې او ویې ویل: «زده کړې د نوي ټولنیز تړون بنسټ او د بېوزلۍ له منځه وړلو کیلي ده.»
د ملګرو ملتونو سرمنشي په دې ناسته کې ویلي، د نړۍ د زده کړو په نظام کې شته درځونه هره ورځ ژورېږي او په نړۍ کې په ځانګړې توګه په بېوزله هېوادونو کې کابو ۲۷۲ میلیونه ماشومان او ځوانان له زده کړو بې برخې دي.
طالبانو د محدودیتونو په لګولو او له شپږم ټولګي پورته نجونو پر مخ د ښوونځیو په تړلو سره ۲۰۲ میلیونه نجونې زده کړو ته له لاسرسي بې برخې کړې دي.
د ګوترش په وینا، په جګړیزه سیمو کې میلیونونه ماشومان ښوونځي ته له تګ پاتې کېږي او ان هغه کسان چې ښوونځیو ته ځي، د کار او ژوند لپاره له وړ مهارتونو بې برخې دي.
نوموړي په دې ناسته کې ټینګار کړی، چې له هراړخیزه او کیفیت لرونکو زده کړو پرته، بېوزلۍ ته د پای ټکی اېښودل او ټولنیز عدالت امکان نه لري.
د ملګرو ملتونو سرمشني په دې ناسته کې په ټوله نړۍ کې د زده کړو په برخه کې د ۴۴ میلیونه ښوونکو کموالی «یو جدي بحران» بللی او ټینګار یې کړی، چې هېوادونه باید د زده کړو سکتور پر وده پانګونه وکړي.
دغه راز ګوترش له پرمختللو هېوادونو او نړیوالو مالي بنسټونو غوښتي، چې له بېوزله هېوادونو سره مرسته وکړي، تر څو وکولی شي د زده کړو برخه کې پانګونه وکړي.
هغه د خپلې وینا په پای کې زده کړې د اودږمهال پراختیايي موخو تر لاسه کولو لپاره تر ټولو پیاوړې وسیله وګڼله او په ټوله نړۍ کې یې ماشومانو ته د کیفیت لرونکو زده کړو د برابرولو غوښتنه وکړه.
