ننګرهار کې سیمه ییز طالب چارواکي وايي، د دې ولایت په رودات ولسوالۍ کې د راکټ یوې پخوانۍ مرمۍ چاودنې د یوه ماشوم ژوند اخیستی او یوه ښځه او یو ماشوم ټپیان شوي دي.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، دغه پېښه نن (چهارشنبې د لړم ۱۴مه) د دې ولایت د رودات ولسوالۍ په «تاتنک» کلي کې رامنځ ته شوې ده.
د حماد په وینا، څو تنو ماشومانو د راکټ یوه پخوانۍ مرمۍ کور ته راوړې او هغه یې د تناره اور ته اچولې، چې چاودنه یې کړې ده.
هغه زیاته کړې، د دې چاودنې په ترڅ کې یو ماشوم وژل شوی او یوه ښځه او یو ماشوم ټپیان شوي دي. د دې پېښې قربانیان د یوې کورنۍ غړي دي.
د طالبانو د امنیه قوماندانۍ ویاند د وژل شوي ماشوم د هویت، جنسیت او عمر او دغه راز د یادې پېښې د ټپیانو د روغتیايي وضعیت په اړه څه نه دي ویلي.
هر کال په ځانګړې توګه ماشومان د هېواد په ګوټ ګوټ کې د جګړو د مهال پاتې شویو ماینونو او ناچاودو توکو په چاودنو کې مړه او ټپیان کېږي.
څو میاشت وړاندې د ماین پاکولو هلو ترست سازمان په یوه راپور کې لیکلي وو، په افغانستان کې د ماینونو قربانیان ۸۰ سلنه ماشومان دي.
د سره صلیب نړیوالې کمېټې هم اعلان کړی وو، چې یوازې په ۲۰۲۴ میلادي کال کې د ۴۳۴ ماشومانو په ګډون لږ تر لږه ۵۶۴ تنو په افغانستان کې د ماینونو او ناچاودو توکو په چاودنو کې ژوند له لاسه ورکړی دی.
