لوګر کې د طالبانو امنیه قوماندانۍ اعلان کړی، چې د دې ولایت په مرکز پل علم ښار کې یوه زړه ښځه او یوه ماشومه نجلۍ په «ناوړه» ډول وژل شوې دي.
رخشانه: لوګر کې د طالبانو امنیه قوماندانۍ په یوه خبرپاڼه کې لیکلي، دغه پېښه د جمعې په شپه (د لړم ۱۶ مه) د دې ولایت مرکز پل علم ښار کې رامنځ ته شوې ده.
خبرپاڼه کې راغلي، تېره شپه دوه تنه غله یوه کور ته اوښتي او یوه ۶۰ کلنه ښځه او یوه ۱۲ کلنه نجلۍ یې لومړی بې هوښه کړې او وروسته یې په تبر باندې وژلې دي.
د خبرپاڼې له مخې، دغه دوه کسانو دوه میلیونه افغانۍ او ۴ زره امریکايي ډالر له دې کوره غلا کړي او له سیمې تښتېدلي دي.
لوګر کې د طالبانو امنیه قوماندانۍ لیکلي، د پېښې په تړاو دوه تنه نن (شنبې د لړم ۱۷ مه) د دې ولایت د مرکز پل علم ښار د عمر آباد له سیمې څخه نیول شوي دي.
امنیه قوماندانۍ د دې دوه کسانو هویت په ډاګه کړی وايي، هغوی په لړمړنیو پلټنو کې په خپل جرم اعتراف کړی دی.
طالبانو ویلي، د دې دوه کسانو دوسیه «د قانوني تعقیب» لپاره د دې ډلې عدلي او قاضيي بنسټونو ته سپارل کېږي.
له دې وړاندې هم په ورته پېښو کې د د ښخو او ماشومانو په ګډون څو تنه د هېواد په بېلابېلو ولایتونو کې قرباني شوي دي.
