افغانستان کې د اروپايي ټولنې دفتر (EU) ویلي، افغانستان کې پر پوهه پانګونه او له زده کوونکو او ښوونکو ملاتړ، د هوسا او بنسټ لرونکې راتلونکې لار ده.
رخشانه: دغه بنسټ نن (دوشنبې د لړم ۱۹ مه) د سولې او پراختیا لپاره د پوهې نړیوالې ورځې په مناسبت په خپله اېکس پاڼه لیکلي، په افغانستان کې له زده کړو ملاتړ بشپړ حیاتي دی.
۱۵۱۱ ورځې کېږي، چې طالبانو له شپږم ټولګي پورته نجونو پر مخ د ښوونځي دروازې تړلې دي.
اروپايي ټولنې لیکلي، علم او پوه په ټولنه کې د تل پاتې سولې، نوښت، د ستونزو د حل او د ټولو لپاره د ځان بساینې راتلونکې کیلي ده.
دغه بنسټ ټینګار کړی، چې پوه د [ټولنې] د پرمختګ ستنه او بنسټ دی او باید ډاډ تر لاسه شي، چې افغان ځوان باید وکولی شي خپله وړتیا وغوړوي.
اروپايي ټولنې د نجونو په ګډون د ټولو لپاره پر زده کړو ټینګار کړی او پوه یې د پرمختګ او سولې لپاره ارزښتناکه بللې ده.
طالبانو په تېرو څلورو کلونو کې د ښځو او نجونو پر وړاندې په محدودیتونو سربېره یې د نجونو پر مخ د ښوونځیو او پوهنتونو دروازې تړلې دي.
