د هرات حوزوي روغتون کې د ډاکترې او عمومي جراحۍ متخصصې شبنم فضلی خپلوان وايي، د طالبانو د امربالمعروف ځواکونو دغه ښځینه ډاکتره څو ساعته نیولې او وروسته یې بېرته خوشې کړې ده.
رخشانه: د شبنم فضلي خاوند قدوس خطیبي نن سهار (دوشنبې د لړم ۱۹ مه) په خپله فسبوک پاڼه د یوه پوسټ په خپرولو سره، هرات کې د دې ښځینه ډاکترې د نیول کېدو خبر ورکړی وو.
ښاغلي خطیبي لیکلي: «مېرمن مې ډاکتر شبنم فضلي، چې هرات کې عمومي جراح ډاکتره ده، د [طالبانو] د امربالمعروف ځواکونو له خوا د روغتون په دروازه کې نیلو شوې او په خواشینۍ سره چې تلېفون ته ځواب نه راکوي.»
معلومه نه ده، دا ښځینه ډاکتره په کوم دلیل نیول شوې او چېرته لېږدول شوې ده. ګمان کېږي، چې هغه د چادرۍ نه اغوستو په تور نیول شوې وي.
څو ساعته وروسته ښاغلي خطیبي په خپله فسبوک پاڼه د یوه پوست په کولو سره د خپلې مېرمنې د خوشي کېدو خبر ورکړ او لیکلي یې دي: «مېرمن مې یوه ډاکتره ده، کلونه کلونه یې خپل ښه ژوند د خلکو په خدمت کې تېر کړی دی.»
د دې ښځینه ډاکترې خاوند ساعت وړاندې هم په خپله فسبوک پاڼه لیکلي وو، چې د طالبانو د امربالمعروف ځواکونه د هرات حوزوي روغتون په دروازه کې ولاړ دي او بې چادرۍ ښځې د روغتون د ننه نه پرېږدي.
پرون یو شمېر رسنیو لیکلي وو، چې د هرات حوزوي روغتون ته د بې چادرۍ ناروغانو او ښځینه ډاکترانو د نه ننوتو بندیر لرې کړای شوی دی.
طالبانو د چهارشنبې له ورځې راهیسې، دولتي ادارو او عمومي روغتون ته له ننوتلو منع کړې وې. رخشانې رسنۍ ته رسېدلې ویډیو ښيي، چې څو پرلپسې ورځې د طالبانو ګمارل شوي کسان د هرات د یو شمېر دولتي ادارو او حوزوي روغتون په دروازه کې په تاوتریخوالي سره د ښځو د ننوتو مخنیوی کوي.
