بادغېس کې سیمه ییز طالب چارواکي وايي، د دې ولایت بالامرغاب ولسوالۍ کې د یو«خوشه ای» ماین چاودنې د درې ماشومانو ژوند واخیست.
رخشانه: بادغېس کې د طالبانو د امنیه قوماندانۍ ویاند صدیق الله صدیقي په خپله اېکس پاڼه لیکلي، دغه پېښه نن مازیګر (پنشنبې د لړم ۲۲ مه) د دې ولایت د بالامرغاب ولسوالۍ په «قروتو» سیمه کې رامنځ ته شوې ده.
د هغه په وینا، دغو درې ماشومانو د څارویو څرولو پر مهال خوشه ای ماین پیدا کړی او د لوبو پر مهال یې چاودنه پرې کړې ده.
بادغېس کې د طالبانو د امنیه قوماندانۍ ویاند زیاته کړې، دغه ماشومان ځای پر ځای وژل شوي دي.
د دې ماشومانو عمر او هویت نه دی معلوم شوی.
د روانې اوونۍ د یکشنبې په ورځ هم د بادغېس بالامرغاب ولسوالۍ کې دوه ماشومانو د خوشه ای ماین چاودنې په ترڅ کې ژوند له لاسه ورکړی وو.
څو میاشتې وړاندې هلو ترست ماین پاکولو سازمان په یوه راپور کې لیکلي وو، چې افغانستان کې د ماینونو قربانیان ۸۰ سلنه ماشومان دي.
د سره صلیب نړیوالې کمېټې د راپور پر اساس، یوازې په ۲۰۲۴ میلادي کال کې د ۴۳۴ ماشومانو په ګډون کم تر کمه ۵۶۴ تنو په افغانستان کې د ماینونو او ناچاودو توکو د چاودنو له امله ژوند بایللی دی.
