د افغان ښځو لپاره ولسي محکمې اعلان کړی، چې د طالبانو له لوري د ښځو د حقونو ماتولو په دلیل د دې ډلې په وړاندې ښايي حکم صادر کړي.
رخشانه: دغه بنسټ نن (دوشنبې د لړم ۲۶ مه) د یوې اعلامیې په خپرولو سره لیکلي، د طالبانو په وړاندې حکم به د روان میلادي کال د دسمبر په ۱۱ مه د هالنډ په هاګ ښار کې تر صادر شي.
د محکمې د حکم د اعلان غونډه به د پاتې کسانو او عیني شاهدانو، نړیوال قضايي پلاوي او بشري حقونو، ښځو حقونو او جنستي عدالت د وتلو شخصیتونو په شتون کې جوړه شي.
د افغان ښځو لپاره د ولسي محکمې په اعلامیه کې راغلي، د دې غوندې په جوړېدو سره به د دې محکمې کار هم پای ته ورسېږي.
د افغان ښځو لپاره ولسي محکمې ویلي، د دې غونډې اجنډا به په نېږدې راتلونکې کې اعلان شي.
دغه محکمه څه موده وړاندې د «هراړخیزه» بشري حقونو د بنسټ او بشري حقونو د درې نورو بنسټونو په نوښت، په افغانستان کې د طالبانو له لوري د ښځو له حقونو د سرغړاوي په پار جوړه شوې وه.
په دې محکمه کې څارنوالان، پاتې شوي، عیني شاهدان، د بشري حقونو مدافعان او د نړیوال حقوقي کارپوهان راټول شوي وو تر څو د طالبانو له لوري د ښځو د حقونو منظم سرغړاوي افشا کړي او د جنسیت پر بنسټ د جرمونو او ځورونې لپاره د حساب ورکولو غوښتنه وکړي.
په دې محکمه کې ښځو او عیني شاهدانو د طالبانو له لوري د ظلمونو، ربړونې او اساسي حقونو څخه د سرغړاوي کیسې وکړې او د عدالت غوښتنه یې وکړه.
