د بیان آزادۍ مرکز (FSC) د تلوېزیون نړیوالې ورځې په مناسبت ویلي، د طالبانو تر واک لاندې افغانستان کې تصویري رسنۍ خپلې وروستۍ سلګۍ باسي.
رخشانه: دغه مرکز پرون (جمعه د لړم ۳۰) په خپله اېکس پاڼه د یوې خبرپاڼې په خپرولو سره لیکلي، هېواد کې د طالبانو د څلورکلنې واکمنۍ پر مهال پر تلوېزیونونو محدودیتونه په بې مخینې توګه زیات شوي دي.
د بیان آزادۍ مرکز په اعلامیه کې راغلي، په تېر یوه کال کې لږ تر لږه ۱۵ تلوېزیونونه د طالبانو په نېغه لارښوونه تړل شوي دي.
دغه مرکز راوړي، طالبانو په تېرو څلورو کلونو کې د تلوېزیونونو د فعالیتونو په اړه ۲۳ امرونه صادر کړي دي.
د بیان آزادۍ مرکز لیکلي: «پر ښځینه خبریالانو د ماسک اغوستل، د بهرنیو تلوېزیونونو خپرونې بندول، د سیاسي ګردیو مېزونو بندول، د سیاسي شنوونکو نه رابلل، د مدني اعتراضونو نه پوښل، د رسنیو له خوا د طالبانو د «افغانستان حکومت» ویلو الزامي کول، د موسیقۍ منع کول او له بهرنیو رسنیو سره د همکارۍ منع کول، هغه اساسي موارد دي، چې د رسنیو په ځانګړې توګه د تلوېزیونونو په فعالیتونو یې جدي اغېز کړی دی.»
د بیان آزادۍ د مرکز رییس نجیب اصل د طالبانو له خوا په رسنیو محدودیتونو ته په اشارې ویلي: «که دغه چلند په همدې ډول سخت او ګړندیتوب سره دوام وکړي، دا احتمال شته، چې راتلوونکی کال په هېواد کې ټول تلوېزیونونه په بشپړه توګه ودرېږي.»
طالبانو د هېواد په ۲۲ ولایتونو کې په رسنیو کې د ساه کښو انځور خپرول بند کړي دي. دغه محدودیتونه په کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندوز، بامیان، دایکنډي، فاریاب، پنجشېر، لغمان، سرپل، بلخ او هرات ولایتونو کې په رسمي ډول د طالبانو له لوري لګول شوي دي.
دغې ډلې په تېرو له څلورو کلونو زیاته موده کې د رسنیو او رسنیو د فعالیتونو په وړاندې د سختو محدودیتونو په لګولو سره، د لسګونو، غږیزو، تصویري او چاپي رسنیو د بندېدو سبب شوي او څو تنه خبریالان، کارکوونکي او رسنیو د فعالان یې نیولي دي.
