خوست کې د طالبانو سیمه ییز چارواکي وايي، چې سبا به یو تن د دې ولایت مرکز خوست ښار کې د خلکو په وړاندې اعدام کړي.
رخشانه: خوست کې د طالبانو د والي ویاند مستغفر ګربز نن (دوشنبې د لیندۍ ۱۰ مه) په خپله اېکس پاڼه د یو پوسټ په خپرولو سره لیکلي، دا کس په قتل تورن دی.
هغه لیکلي، دغه سړی به سبا غرمه مهال لس بجې د دې ولایت مرکز خوست ښار په سپورتي لوبغالي کې د خلکو په وړاندې اعدام کړای شي.
خوست کې د طالبانو د والي ویاند، له خلکو غوښتي، چې د اعدام حکم د نندارې لباره سبا سپورتي لوبغالي ته ورشي.
هغه له خلکو دا هم غوښتي، چې د تلېفونونو او نورو هر ډول انځور اخیستوونکو توکو له راوړلو ډډه وکړي.
په قتل د تورن کس، چې ټاکل شوې سبا اعدام شي، هویت، او عمر نه دی معلوم.
طالبانو په تېرو څلورو کلونو کې د هېواد په یو شمېر ولایتونو کې ۱۱ تنه د بېلا بېلو تورونو له کبله د خلکو په وړاندې اعدام کړي دي.
په وروستي ځل دغې ډلې د تلې میاشتې په وروستیو کې یو تن د قتل په تور په بادغیس ولایت کې د خلکو په وړاندې اعدام کړی وو.
