کونړ ولایت کې یو شمېر خبریالان ادعا کوي، چې په دغه ولایت کې سیمه ییز طالب چارواکي له دوی سره دوه ګونی او له «تبعیض ډک» چلند کوي.
رخشانه: دغه خبریالان وايي، په دې ولایت کې سیمه ییز طالب چارواکي د خصوصي رسنیو خبریالانو ته د مهمو پېښو د خبري پوښښ لپاره په پروګرامونو کې د ګډون اجازه نه ورکوي او یوازې د دوی ملاتړو خبریالان ته د پېښو د پوښښ اجازه ورکوي.
د کونړ د سیمه ییزه خبریالانو په خبره، په دې ولایت کې د طالبانو سیمه ییز چارواکي نه یوازې د دوی وضعیت ته رسېدنه نه ده کړې، بلکې په ډېرو پېښو کې یې دوی ګواښلي هم دي.
کونړ کې یوه سیمه ییز خبریال د هویت پټ ساتلو سره و ویل: «څو ورځې وړاندې یوه دولتي برنامه جوړه شوې وه، په دولت پورې تړلو د [طالبانو] رسنیو په هغه پروګرام کې حضور درلود. خو ما او د خصوصي رسنیو نورو خبریالانو ته یې په دې پروګرام کې د ګډون اجازه ورنه کړه. ان موږ ته یې خبر هم نه وو راکړی.»
دغه راز د کونړ خبریالان شکایتلري، چې طالبانو په دوه میاشتې وړاندې خونړۍ زلزله کې چې په دې ولایت کې وشوه، د خصوصي رسنیو خبریالانو ته «په اسانۍ [زلزله ځپلو سیمو] ته د داخلېدو اجازه ورنه کړه.»
په کونړ کې د سعیدالله په (مستعار نوم) سیمه ییز خبریال ویلي دي: «هغوی [طالبان] د زلزلې پر مهال زموږ کال ډېر سخت کړی وو. د طالبانو تر واک لاندې ملي تلوېزیون او نورو ټولو طالب پلوه رسنیو په اسانۍ سره راپورونه چمتو کول، خو هغوی [طالبانو] موږ ته د راپور چمتو کولو اجازه نه راکوله او که یې راکوله هم، په ډېره سختۍ او ان په پلمو او زاریو.»
کونړ کې یو بل خبریال هم د هویت پټ ساتلو سره ویلي، په دې ولایت کې سیمه ییز طالب چارواکي د خصوصي رسنیو خبریالانو ته د «کوچینو» پېښو د پوښښ اجازه ورکوي، چې دغه پروګرامونه د دې ډلې په «ګټه له تبلیغ» پرته بل خبري ارزښت نه لري.
طالبانو پر هېواد په خپله په تېر څه باندې څلور کلنه واکمنۍ کې پر رسنیو، خبریالانو او رسنیزو فعالیتونو سخت بندیزونه لګولي دي.
دغې ډلې د محدودیتونو په لګولو سره د لسګونو رسنیو د تړل کېدو او د ګڼ شمېر خبریالانو د بېکاره کېدو لامل شوي او معلوماتو ته د لاسرسي وضعیت یې خورا سخت کړی دی.
