خوست کې د یو تن د اعدام حکم تر پلي کېدو وروسته، د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ ویلي، دغه حکم د یوه ۱۳ کلن هلک له خوا پلی شوی دی.
رخشانه: بنټ تېره ورځ ناوخته (سه شنبې د لیندۍ ۱۰ مه) په خپله اېکس پاڼه د یو پوسټ په خپرولو سره لیکلي، دې کس د اعدام حکم پلي کېدو پر مهال «د ماشومانو په ګډون زرګونه خلک صحنې ته راټول شوي وو.»
د طالبانو سترې محکمې تېره ورځ د یوې کورنۍ د ۱۳ غړو د وژنې په تور د خوست ولایت په سپورتي لوبغالي کې د زرګونه نندارچیانو په حضور کې د یو تن د اعدام حکم پلي کېدود خبر ورکړی وو.
بنټ د خلکو په وړاندې د افرادو په اعدام محکمول غندلي او د هغې پلي کېدل یې له« بشري حقونو او انساي کرامت څخه سخت سرغړاوی او د اسلامي قوانینو سره ناسم عمل» بللی دی.
په ورته وخت خوست کې سیمه ییز طالب چارواکو ویلي، د منګل چې تېره ورځ اعدام شو، دوه زامن هم له خپل پلار سره د همکارۍ په تور په اعدام محکوم شوي دي.
خوست کې د طالبانو د والي ویاند مستغفر ګربز په خپله اېکس پاڼه لیکلي، چې منګل او دوه زامنو یې کابو شپږ میاشتې وړاندې د دې ولایت د «علي شېر» ولسوالۍ په «بوخاني» کلي کې د یوې کورنۍ ۱۳ تنه غړي په «بې رحمه او مرموزه» توګه وژلي وو.
ګربز لیکلي دي، «د شرعي قوانینو سره سم، څرنګه چې د مقتول وارثان له هېواده بهر دي، د منګل پر زامنو د «قصاص» حکم ځنډېدلی دی.»
د هغه په وینا، که چېرې د مقتول وارثانو شتون درلودای، د منګل زامن به هم اعدام کړای شوي وو.
سره له دې، چې د بشري حقونو سازمانونو او ملګرو ملتونو په وار وار په افغانستان کې د طالبانو له خوا په عام محضر کې د افرادو د اعدام د درېدو غوښتنه کړې، خو دغې ډلې په تېرو څه باندې څلورکلنه واکمنۍ کې لږ تر لږه ۱۲ تنه د خلکو په وړاندې اعدام کړي دي.
