په افغانستان کې د ملګرو ملتونو د ښځو څانګې (UN Women) ویلي دي، د ښځینه کارکوونکو د شتون مخنیوی په افغانستان کې ژوغورونکي خدمات لا زیانمنوي.
رخشانه: دغه بنسټ نن (یکشنبې د لیندۍ ۱۶ مه) په خپله اېکس پاڼه د یوې اعلامیې په خپرولو سره لیکلي، په افغانستان کې د ملګرو ملتونو دفترونو ته د ښځينه کارکوونکو د نه پرېښودو څخه درې میاشتې تېرې شوې دي.
په افغانستان کې د UN Women ځانګړې استازې سوزان فرګوسن ویلي، د دې درې میاشتو په موده کې، د ملګرو ملتونو ښځینه کارکوونکو له خپلو کورونو «د افغانستان خلکو ته د خدماتو وړاندې کولو حیاتي کار ته دوام ورکړی دی.»
هغې ویلي، ښځينه کارکوونکو په دې موده کې د هېواد په ختیځ او شمال کې زلزله ځپلو ته د مرستو رسولو، له ایران او پاکستان څخه د را ایستل شویو کډوالو ملاتړ ته دوام ورکړی او خوړو، پاکو اوبو، روغتیايي خدماتو، خوندي سرپناه اړمنو ښځو او ماشومانو ته، کرنیز ملاتړ او د اقلیمي بدلونونو زغمولو برخه کې مرستې رسولې دي.
په افغانستان کې د ملګرو ملتونو د ښځو څانګې ځانګړې استازې په هېواد کې اړمنو کسانو ته د مرستو رسولو برخه کې د ښځينه کارکوونکو حیاتي رول ته اشاره کړې وايي، هر څومره چې پر ښځو د طالبانو محدودیتونه غځېږي، په همغه کچه به ژوغورونکو خدماتو ته ګواښ زیاتېږي.
هغې ټينګار کړی، چې په افغانستان کې د ملګرو ملتونو د فعالیتونو لپاره د ښځینه کارکوونکو ځای ناستي امکان نه لري او یوازې د هغوی په شتون کولی شي، په خوندي توګه ښځو او نجونو ته لاسرسی ولري.
فرګوسن د ملګرو ملتونو د دفترونو د ښځینه کارکوونکو په وړاندې د طالبانو محدودیتونه د «ملګرو ملتونو په منشور کې د بشري حقونو او برابرۍ د بنسټیزو اصولو سرغړونه» وبلله وايي، دغه محدودیتونه ملګري ملتونه د خپل ماموریت د ترسره کولو برخه کې کمزوری کوي.
ملګرو ملتونو د دې سازمان دفترونو ته د ښځینه کارکوونکو د ننوتلو بندیز لرې کولو او کاري ساحو ته د دوی خوندي لاسرسي ډاډمن کولو غوښتنه کړې، تر څو «هغو ښځو او نجونو ته چې تر نورو ډېرې اړمنې دي مرستې ورسېږي.»
