په بلخ کې یو شمېر زده کوونکي هلکان وايي، په دغه ولایت کې د دولتي او خصوصي ښوونځینو ادارو د تعلیمي اسنادو لپاره پګړۍ لرونکي انځورونه اجباري کړي دي.
رخشانه: بلخ کې د بېلا بېلو ښوونځیو لږ تر لږه پنځو تنو زده کوونکو رخشانې رسنۍ ته ویلي، د ښوونځیو مسوولانو دوی ته ویلي، چې د تعلمي اسنادو تر لاسه کولو لپاره پګړۍ لرونکي انځورونه ادارې ته وسپاري.
د زده کوونکو په وینا، دغه امر د ښوونیز کال له پای ته رسېدو او د کلنیو ازموینو له ختمېدو وروسته صادر شوی دی.
هغوی ویلي، د دولتی او خصوصي ښوونځیو ادارو هغه انځورونه، چې بې پګړۍ اخیستل شوي وو، نه دي منلي او دوی ته یې امر کړی، تر څو په پګړۍ کې نوي انځورونه ورته چمتو کړي.
د دې امر پر بنسټ، د دولتي او خصوصي ښوونځيو په ټولو تعلیمي اسنادو کې، که ستاینلیکونه دي او که د ازموینو پایلې، د زده کوونکو انځورونه باید له پګړۍ سره وي.
زده کوونکو د دې محدودیت په لګولو په نیوکې سره زیاته کړې، چې د دې قانون پلي کېدل د دوی د لالهاندۍ لامل شوی دی.
بلخ ولایت کې د یو ښوونځي د یوولسم ټولګي زده کوونکي محمد ویلي، د ښوونځي ادارې دوی ته ویلي، چې له «پګړۍ پرته انځور» باندې دوی ته «اطلاع نامې» نه ورکوي.
هغه ویلي دي: «زموږ ښوونکي یوه پګړۍ ټولګي ته د ننه راوړه او ویل یې همدا په سر کړی او ټول د خپلو نمرو د پایلو په خاطر په دې پګړۍ کې انځورونه واخلۍ. زموږ ښوونکي ویل له پګړۍ پرته انځور د منلو نه دی.»
د طالبانو د پوهنې وزارت د روان کال په لومړیو کې د دولتي او خصوصي ښوونځیو د زده کوونکو د جامو په اړه یوه ۹ مادیزه لایحه صادره کړې ده.
د دې لایحې پر بنسټ د ښوونکو جامې کمیس او پرتوګ له پګړۍ یا خولۍ سره او د دیني مدرسو د ښوونکو لپاره هم کمیس او پرتوګ او د دیني عالمانو سره مناسبه پګړۍ ټاکل شوې وه.
طالبانو واک ته په بیا رسېدو سره د هېواد د پوهنې ښوونیز نصاب ته بدلون ورکړی دی. د دې ډلې له خوا د ښوونیز نصاب بدلون، د زده کړو د فعالانو او شنوونکو اندېښنې له ځان سره درلودې.
د زده کړو د فعالانو په باور، د دې ډلې له خوا د کتابونو د منځپانګې بدلون ښايي د دې لامل شي، چې ماشومان لا د «دیني افراط» لوري ته وهڅول شي.
