د ښځو او ماشومانو د څېړنې او عدالت غوښتې شبکې، افغانستان کې د جنستي توپیر د پای ته رسولو لپاره د نړیوال پیوستون غوښتنه وکړه

د ښځو او ماشومانو د څېړنې او عدالت غوښتې شبکې (WCRAN) ، کاناډا کې د یوې غونډې په جوړولو سره، د طالبانو تر واک لاندې افغانستان کې، د جنسیتي توپیر د پای ته رسولو لپاره غوښتنه وکړه.

رخشانه: دغه غونډه نن (سه شنبه د لیندۍ ۱۸ مه) «له کابل نه تر اوتاوه: په افغانستان کې د جنسیتي توپیر د پای ته رسولو نړیوال پیوستون» تر نامه لاندې د کاناډا په پارلمان کې جوړه شوې وه.

په دې غونده کې د کاناډا پارلمان غړو، د نړیوالو بنسټونو استازو، سفیرانو، ديپلوماتانو، څېړونکو، د ښځو د حقونو فعالانو، د پوهنتون استادانو او خبریالانو ګډون کړي وو او د افغانستان د ښځو د وضعیت په اړه د نړیوالې پاملرنې غوښتونکي شول.

غونډه په افغانستان کې د جنسیتي توپير د پېژندنې او جرمي کولو لپاره، د نړیوالې اجماع د رامنځ ته کېدو، د نړیوال حساب ورکولو کړنلارو د پیاوړتیا او د نړیوال سیاست جوړونې پروسو کې د هېواد د ښځو د رول روښانه کولو په موخه جوړه شوې وه.

په غونډه کې د کاناډا پارلمان غړي علي احساسي د ښځو د حقونو د تحقق لپاره د فعالانو د دوامداره ملاتړ ستاینه وکړه او د کاناډا د حکومت او پارلمان پر ژمنې یې ټینګار وکړ، چې د افغان مېرمنو ملاتړ به کوي.

د ښخو او ماشومانو د څېړنې او عدالت غوښتنې شبکې مسوولې زرقا یفتلي هم په دې غونډه کې د جنسیتي توپیر د پای ته رسولو لپاره د پیوستون پر اړتیا ټینګار وکړ او د عدالت د خوندیتوب لپاره یې د دوامداره نړیوال عمل، همکارۍ او عدالت غوښتنې، غوښتنه وکړه.

د ښځو او ماشومانو د څېړنې او عدالت غوښتنې شبکې د کاناډا له دولت نه غوښتي، چې په افغانستان کې د جنسیتي توپیر د په رسمیت پېژندنې لپاره د مبارزې نړیواله مشري پر غاړه واخلي.

دې بنسټ د کاناډا حکومت ته د افغان ښځو لپاره د سملاسي ګام پورته کولو، د نړیوال عدالت کړنلارو پر پیاوړي کولو او افغانستان پورې اړوند ټولو سیاسي بحثونو کې د ښځو د حقونو ځای پر ځای کولو پر اړتیا ټینګار کړی دي.

د دې ناستې ګډونوالو له ملګرو ملتونو او نړیوالې ټولنې غوښتي، چې افغان ښځې د تصیم نیولو پروسه کې د ننه کړي او «د ښخو د فرصتونو او راتلونکې قصدي تخریب، د جنسیتي توپیر د بېلګې په توګه» په رسمیت وپېژني.

طالبان په افغانستان کې د ښځو او نجونو د حقونو او بنسټیزو خپلواکیو په وړاندې په پراخو محدودیتونو لګولو د ښځو سره «په جنسیتي توپیر» تورن دي. د ښځو د حقونو فعالانو په وار وار له نړیوالې ټولنې په افغانستان کې د جنستي توپیر د په رسمیت پېژندنې غوښتنه کړې ده.