د افغان ښځو د پیوستون غورځنګ په یوه اعلامیه کې لیکلي، د طالبانو تر واک لاندې افغانستان کې بشري حقونه یو واقعیت نه، بلکې یو ټپي او څنډې ته کړای شوی نوم دی.
رخشانه: دغه اعتراضي غورځنګ نن (چهارشنبې د لیندۍ ۱۹ مه) د بشري حقونو نړیوالې ورځې سره سم لیکلي، په داسې حال کې، چې په ټوله نړۍ کې میلیونونه انسانان له حقونو او اساسي خپلواکیو برخمن دي، خو افغان ښځې او نجونې ان له خپلو تر ټولو لومړنیو انساني حقونو بې برخې دي.
د افغان ښځو د پیوستون غورځنګ په اعلامیه کې راغلي، د بشري حقونو په نړیواله ورځ په ټوله نړۍ کې له ګډو انساني ارزښتونو، عدالت، برابرۍ او آزادۍ څخه دفاع کېږي، خو په افغانستان کې بشري حقونه نور یو واقعیت نه، بلکې یو ټپي او څنډې ته کړای شوی نوم دی.
د دې غورځنګ غړو ویلي، د ښځو او نجونو په وړاندې د طالبانو محدودیتونه، د بیان د آزادۍ بندول، خپل سرې نیونې، ربړونې، غیرقانوني محاکمې او د طالبانو له لوري د مدني او رسنیزو فعالانو ځپل، د افغانستان د خلکو د ورځني ژوند برخه ګرځېدلې ده.
معترضو مېرمنو له نړیوالې ټولنې پوښتلي، چې ولې په افغانستان کې د بشري حقونو پراخې او ښکاره سرغړونې له عملي ګامونو سره مل نه دي او ولې د ښځو غږ، چې د ژوند، زده کړې او خپلواکۍ د حق لپاره مبارزه کوي، په پام کې نه نیول کېږي؟
هغوی له نړیوالې ټولنې، د بشري حقونو له بنسټونو او دولتونو غوښتي، چې په افغانستان کې د بشريت پر وړاندې د جنایت په توګه د جنسیتي توپیر د په رسمیت پېژندنې تر څنګ د بشري حقونو سرغړونې په رسمي ډول وڅېړي او مستندې یې کړي.
معترضو ښځو دغه راز د حساب ورکولو کړنلارې په جوړولو او په افغانستان کې د بشري حقونو د سرغړونکو په توګه د طالبانو د نړیوالې محاکمې په اړه ټينګار کړی دی.
د افغان ښځو د پیوستون غورځنګ غړو په پای کې د افغان مېرمنو، مدلي فعالانو، خبریالانو او کډوالو لپاره د قانوني، سیاسي او بشري ملاتړ غوښتنه کړې ده.
