په افغانستان کې د ملګرو ملتونو د ماشومانو د ملاتړ صندوق (یونیسف) یو ځل بیا د نجونو پر زده کړو ټینګار کړی دی.
رخشانه: دغه بنسټ نن (چهارشنبې د لیندۍ ۱۹ مه) د بشري حقونو د نړیوالې ورځې په مناسبت او د ښځو په وړاندې د تاوتریخوالي له منځه وړلو ۱۶ ورځني کمپاین په پای ته رسېدو سره خپره کړې خبرپاڼه کې لیکلي، په افغانستان کې له تېرو څه باندې څلورو کلونو راهیسې نجونې له زده کړو بې برخې دي.
یونیسف په افغانستان کې د نجونو د زده کړو او تحصیل بندېدو ته په اشارې د هغه تنکیو نجونو د پیاوړتیا غوښتنه وکړه چې «ډېری وخت یې غږ نه اورېدل کېږي.»
دغه بنسټ ویلي: «زده کړې د ټولو ښځو او نجونو لپاره حق دی. دغه حق د هغوی د ودې، روغتیا او ملاتړ لپاره حیاتي دی.»
د ۱۴۰۴ ښوونیز کال له پای ته رسېدو سره سم، یو زر او ۵۴۵ ورځې کېږي، چې طالبانو له شپږم ټولګي پورته نجونو پر مخ د ښوونځیو دروازې تړلې دي.
دغې ډلې په دولتي او خصوصي پوهنتونونو کې هم د نجونو د تحصیل مخنیوی کړی دی. له یو زر او سلو زیاتې ورځې کېږي، چې پوهنتونونه هم د نجونو پر مخ تړل شوي دي.
سره له دې، چې نړیوالو بنسټونو، له دې ډلې یوناما او د زده کړو فعالانو له طالبانو د نجونو لپاره د ښوونځیو او پوهنتونو د دروازو د پرانستو غوښتنه کړې ده، خو دې ډلې تر اوسه د دوی غوښتنې ته مثبت ځواب نه دی ورکړی.
