د بیان د آزادۍ مرکز(FSC) د طالبانو تر واک لاندې افغانستان کې د خبریالانو او بیان آزادۍ د مدافعینو وضعیت اندېښمنوونکی بللی دی.
رخشانه: دغه مرکز تېره ورځ (چهارشنبې د لیندۍ ۱۹ مه) د بشري حقونو د نړیوالې ورځې په مناسبت اعلامیه کې لیکلي، د مدني خپلواکیو ځپل، رسنیز محدودیتونه، د خبریالانو نیول او ګواښل او د خپلواکه غږونو غلي کول، له بشري حقونو ښکاره سرغړاوی دی.
د بیان د آزادۍ مرکز په اعلامیه کې راغلي، د افغانستان د ننه او ګاونډیو هېوادونو کې لسګونه خبریالان په سختو، بې برخلیکه او وړ ملاتړ پرته شرایطو کې ژوند تېروي او له پاکستان او ایران څخه د خبریالانو ایستل له ګډوالو سره د بشري حقونو، جینوا کنوانسیون او نړیوالو معیارونو او اصولو سره په ټکر کې دي.
د بیان د آزادۍ مرکز د طالبانو تر واک لاندې افغانستان کې د خبریالانو پر وضعیت اندېښنه ښودلې، لیکلي یې دي، ډېری د هغو دا مهال په بې سرپنايۍ او د طالبانو د مستقیمو امنیتي ګواښونو سره مخ دي او لسګونه خبریالان د طالبانو له لوري نیول شوي او زنداني شوي دي.
د دې مرکز په وینا، لارښود شوي سانسور او ځان سانسورۍ، د تحلیلي خپرونو محدودول او د خپلواکو رسنیو د غږ غلي کول خلک اطلاعاتو ته له لاسرسي محروم کړي، د بیان آزادۍ یې عملآ فلج کړې او ښځینه خبریالانې تر ټولو ډېرې د طالبانو د سیستماتیکو فشارونو او تبعیض قرباني شوې دي.
د بیان د آزادۍ مرکز د بیان د آزادۍ او خبریالانو د حقونو د دفاع غوښتنه کړې او د بیان د آزادۍ او رسنیو د خپلواکۍ د سرغړونو په په مستندولو یې ټينګار کړی دی.
دغه راز یاد مرکز په بېړنۍ توګه له ایران او پاکستان څخه د خبریالانو د غیرقانوني ایستلو د درېدو، د خبریالانو د حقونو د دفاع لپاره له نړیوالو سازمانونو سره د همکارۍ پیاوړي کولو او د طالبانو له زندانونو د بندي خبریالانو د خوشي کېدو غوښتنه کړې ده.
