ننګرهار کې سیمه ییز طالب چارواکي وايي، د دې ولایت په نازیان ولسوالۍ کې یو لېوه د ښځو او ماشومانو په ګډون د یوې کورنۍ اووه غړي ټپیان کړي دي.
رخشانه: ننګرهار کې د طالبانو د عامې روغتیا ریاست ویاند نقیب الله رحیمي ویلي، دغه پېښه تېره ورځ (چهارشنبې د لیندۍ ۱۹ مه) د دې ولایت د نازیان ولسوالۍ په سروبي ولسوالۍ اړوند سیمه کې رامنځ ته شوې ده.
هغه زیاته کړې، دغه لېوه د یوې ښځې او درې ماشومانو په ګډون د یوې کورنۍ اووه غړي ټپیان کړي دي.
د هغه په وینا، د یادې کورنۍ دغه اووه غړي د درملنې په موخه د غني خېلو ولسوالۍ روغتون ته وړل شوي او روغتیايي حالت یې ښه دی.
معلومه نه ده، چې لېوه څه ډول د دې کورنۍ اووه غړي داړلي دي.
له بل لوري د سیمې اوسېدونکي وايي، د لېوه له لوري داړل شوي کسان د دریو کورنیو غړي دي.
د سیمې د اوسېدونکو په وینا، څلور تنه د یوې کورنۍ، دوه تنه د بلې کورنۍ او یو تن بیا د بلې کورنۍ وو. له دې کسانو څلور تنه د مخ په برخه کې ټپیان شوي دي.
هغوی زیاته کړې «په غالب ګمان لېوه لیونی شو او کولای یې شوای زیات کسان ټپیان کړي.»
د سیمې اوسېدونکي وايي، د ژمي په رارسېدو سره په ډېری سیمو کې لېوان له غرونو راکوز شوي او د سیمې اوسېدونکو ته یې ستونزې جوړې کړې دي.
ننګرهار کې د طالبانو سیمه ییزه اداره غواړي په ژمي کې د لېوانو د مهارولو لپاره ګام پورته کړي.
