سمنګان کې سیمه ییز طالب چارواکي وايي، په دغه ولایت کې د یوې ترافيکي پېښې له کبله، ۸ تنو ته مرګ ژوبله اوښتې ده.
رخشانه: سمنګان ولایت کې د طالبانو د امنیه قوماندانۍ ویاند حشمت الله رحماني سیمه ییزو رسنیو ته ویلي، نن (دوشنبې د لیندۍ ۲۴ مه) سهار شاوخوا ۱۰ بجې یو سراچه ټکسي موټر له یوه بار وړونکي ټېلر موټر سره د دې ولایت د حضرت سلطان ولسوالۍ په «غزني ګک» کلي کې ټکر کړی، چې له امله یې د سراچې موټر چلوونکي او دوه ښځو ژوند له لاسه ورکړی او د یوې ښځې په ګډون پنځه تنه نور ټپيان شوي دي.
د هغه په وینا، د پېښې له رامنځ ته کېدو وروسته په دغه ولایت کې د طالبانو د امنیه قوماندانۍ د لومړنیو څېړنو ډله د پېښې ځای ته تللې، د مړو جسدونه او ټپیان یې د درملنې او لا څېړنې په موخه د سمنګان ولایتي روغتون ته لېږدولي دي.
رحماني وايي، د دې پېښې ټول قربانیان د سراچې موټر سورلي او د سمنګان ولایت د مرکز ایبک ښار اوسېدونکي وو.
سمنګان ولایت کې د طالبانو د امنیه قوماندانۍ ویاند د موټر چلوونکي بې احتیاطي د دغه پېښې د رامنځ ته کېدو لامل بللی دی.
ترافیکي پېښې هره ورځ د هېوادوالو څخه قرباني اخلي، د سړکونو خرابوالی، سختوالی او غرنۍ سیمې، د سړکونو د پلنوالي کموالی او د موټر چلوونکو بې احتیاطي هغه عوامل دي، چې د دغه ډول پېښې د رامنځ ته کېدو سبب کېږي.
