د ملګرو ملتونو د بشري حقونو څانګې، د طالبانو له خوا د دې سازمان اړوند بنسټونو پر ښځینه کارکوونکو، د لګول شویو محدودیتونو لرې کولو غوښتنه کړې ده.
رخشانه: یاد بنسټ نن (سه شنبې د لیندۍ ۲۵ مه) په خپله اېکس پاڼه د یوې اعلامیې په خپرولو سره لیکلي، د دې محدودیت له لګېدو ۱۰۰ ورځې تېرېږي.
د ملګرو ملتونو د بشري حقونو څانګې له طالبانو غوښتي، چې دغه ټول محدودیتونه لرې کړې، تر څو د دوی حیاتي ملاتړ ټولو اړمنو کسانو ته ورسېږي.
دغه بنسټ ټينګار کړي، چې د ښځو او نجونو په وړاندې سیستماتیک تبعیض د افغانستان په ګټه نه دی او باید ژر تر ژره پای ته ورسېږي.
یوناما څو ورځې وړاندې په خپل درې میاشتي راپور کې د ملګرو ملتونو د ښځینه کارکوونکو د فعالیت بندېدو ته اشاره کړې ویلي یې وو، دغه محدودیتونه د دې سازمان د ځينو فعالیتونو د ځڼد سبب شوي دي.
یاد بنسټ ویلي وو، له ایران او پاکستان نه د افغان کډوالو جبري ایستلو او د ملګرو ملتونو د ښځینه کارکوونکو د فعالیت مخنیوي، د اړمنو خلکو وضعیت ته رسېدنه ستونزمنه کړې ده.
که څه هم په ملګرو ملتونو پورې تړلو دفترونو کې، د ښځینه کارکوونکو د شتون او فعالیت په اړه د محدودیتنو لرې کولو پرلپسې غوښتنې شوې، خو طالبانو تر اوسه په دې برخه کې کوم اقدام نه دی تر سره کړی.
