په افغانستان کې د ملګرو ملتونو د خوړو نړیوال سازمان (WFP) وايي، په افغانستان کې د لوږې بحران د سختېدو په حال کې دی.
رخشانه: دغه بنسټ نن (سه شنبې د لیندۍ ۲۵ مه) په خپله اېکس پاڼه د یوې اعلامیې په خپرولو سره لیکلي، ۱۷ میلیونه وګړي له سختې لوږې سره مخ دي او ۴ میلیونه ماشومان د خوارځواکۍ له ګواښ سره مخ دي.
د خوړو نړیوال سازمان د خبرداري پر اساس، افغانستان کې سږ ژمی له ۱۷ میلیونه تنه د خوړو نه خوندیتوب سره مخ دي، په داسې حال کې، چې د لوږې او خوراځواکۍ لمن مخ په زیاتېدو ده.
دغه بنسټ ارزولې چې تېر کال د ۱۴.۸ میلیونه وګړو باندې دا مهال درې میلیونه، ښځې، نارینه او ماشومان نور هم په سخته لوږې ورزیات شوي یا د (IPC3+) سره مخ شوي دي.
د ملګرو ملتونو د خوړو نړیوال پروګرام وړاندوینه کړې، چې د ماشومانو خوراځواکي هم په زیاتېدو ده او په راتلونکي کال کې به څلور میلیونه ماشومان ترې اغېزمن شي.
دغه بنسټ ویلي، که د ماشومانو خوارځواکي درملنه نه شي، د ژمي په دې ساړه موسم او په داسې وخت کې، چې خواړه هم کم دي، ښايي د ماشومانو مړینه هم زیاتوالی وکړي.
په افغانستان کې د خوړو نړیوال پروګرام رییس جان آیلیف ویلي دي: «د خوړو نړیوال پروګرام میاشتې کېږي، چې په افغانستان کې د ښاره او ژور انساني بحران د نښو په اړه خبرداری ورکوي.»
هغه زیاته کړې، د ماشومانو مړینه مخ په زیاتېدو ده او د هغو د ګواښ سختوالی په راتلونکو میاشتو کې شتون لري.
هغه ټينګار کړی دی، چې په وروستیو څو لسیزو کې د لومړي ځل لپاره، د خوړو نړیوال سازمان نه شي کولی، چې په ورته وخت کې د ژمي په کچه لوی غبرګون پیل کړي او په ټول هېواد کې بېړنۍ او د تغذیې ملاتړ پراخ کړي.
د خوړو نړیوال پروګرام په پای کې ویلي، په بېړنۍ توګه ۴۶۸ میلیون ډالرو ته اړتیا ده، تر څو د افغانستان د خلکو شپږ میلیونه زیانمنونکو کسانو ته د ژغورنې وړ خوړو مرسته ورسوي او هغوی سره د سخت ژمي په تېرېدو کې ملګري شي.
د ملګرو ملتونو د خوړو او کرنۍ ادارې (FAO) هم د طالبانو تر واک لاندې افغانستان کې د خوړو د وضعیت له خرابوالي خبرداری ورکړی ویلي یې دي، کابو ۱۷.۴ میلیونه کسان له سختې لوږې سره مخ دي.
د خوړو او کرنۍ ادارې لیکلي دي: «وړاندوینه کېږي، چې په افغانستان کې کابو ۱۷.۴ میلیونه وګړي به د ژمي په دې سخت او د اوبو د کمښت په موسم کې د لوړې کچې لوږې سره مخ شي.»
څه موده وړاندې یوناما په یوه راپور کې ویلي وو، د خوړو نه خوندیتوب همدارنګه سخت دی. د ماشومانو او ښځو د خوارځواکۍ کچه ۱۵ سلنه لوړه شوې او په مخ کې ژمي کې میلیونه کسان بې مرستو پاتې کېږي.
یوناما په افغانستان کې بشري وضعیت «خورا بحراني» بللی وايي، د مرستو رسولو لپاره د بودجې کموالي زرګونه تنه په ځانګړې توګه ښځې او ماشومان ګواښي. دغه بنسټ له مرستندویه بنسټونو د ملاتړ د زیاتوالي غوښتنه کړې ده.
