طالبانو روانه اوونۍ پر بېلا بېلو تورونو په ننګرهار، فاریاب، بدخشان، غزني، بلخ جوزجان او کابل ولایتونو کې د شپږو ښځو په ګډون ۳۹ تنه د خلکو په وړاندې په دورو وول.
رخشانه: دغه کسان د دوه نارینه وو تر منځ د جنسي اړیکې، نامشروع اړیکې، له واده بهر جنسي اړیکې، غلا، جوارګرۍ او نامشروع نکاح په تورونو په دغه اتو ولایتونو کې په دورو وهلي دي.
شنبې د (لیندۍ ۲۲ مه) د یوې ښځې په ګډون دوه تنه د نامشروع اړیکې په تور د ننګرهار ولایت په شېرزاد ولسوالۍ کې د خلکو په وړاندې ۳۰ دورې وهل شوي دي.
معلومه نه ده، چې دغه کسان په څومره بند محکوم شوي دي.
یکشنبې د (لیندۍ ۲۳ مه) د دوه ښځو په ګډون ۱۱ تنه د نامشروع اړیکې، له واده بهر جنسي اړیکې، د دوه نارینه وو تر منځ د جنسي اړیکې، غلا او جوارګرۍ په تورونو په فاریاب او تخار ولایتونو کې د خلکو په وړاندې په دورو وهل شوي دي.
د دوه ښځو په ګډون څلور تنه د نامشروع اړیکې او له واده بهر جنسي اړیکې په تور د فاریاب ولایت په ګرزیوان ولسوالۍ کې ۲۵ دورو وهل شوي دي.
دغه څلور تنه د محکمې د پرېکړې پر اساس په یوه کال تنفذي بند هم محکوم شوي دي.
اوه تنه، د دوه نارینه وو تر منځ د جنسي اړیکې، غلا او جوارګرۍ په تورونو د تخار ولایت په ینګي کلا ولسوالۍ کې د خلکو په وړاندې، ۱۵، ۲۰ او ۳۹ دورې وهل شوي دي.
دغه کسان د محکمې د پرېکړې له مخې، د یوه کال تر یوه کال او شپږو میاشتو پورې په تنفذي بند هم محکوم شوي دي.
سه شنبې د (لیندۍ ۲۵ مه) د یوې ښځې په ګډون څلور تنه، د نامشروع اړیکې، له واده بهر جنسي اړیکې او د دوه نارینه وو تر منځ د جنسي اړیکې په تورو په بدخشان او غزني ولایتونو کې د خلکو په وړاندې په دورو ووهل شول.
د یوې ښځې په ګډون دوه تنه د نامشروع اړیکې په تور د بدخشان ولایت په یفتل ولسوالۍ کې ۲۵ دورې و وهل شول.
معلومه نه ده، چې دا کسان په څومره وخت بند محکوم شوي دي.
دوه تنه د دوه نارینه وو تر منځ د جنسي اړیکې او له واده بهر د جنسي اړیکې په تور د غزني ولایت په اندړو ولسوالۍ کې د خلکو په وړاندې له ۳۵ تر ۳۹ پورې دورې وهل شوي او په یوه کال تنفذي بند هم محکوم شوي دي.
چهارشنبې د (لیندۍ ۲۶ مه) د دوه ښځو په ګډون څلور تنه د الکولي مشروباتو د لېږد، له واده بهر جنسي اړیکې او د دوه نارینه وو تر منځ د جنسي اړیکې په تور په بلخ او جوزجان ولایتونو کې د خلکو په وړاندې په دورو وهل شوي دي.
یو تن د الکولي مشروباتو د لېږد په تور د بلخ ولایت په مزارشریف ښار کې د خلکو په وړاندې ۳۹ دورې و وهل شو.
معلومه نه ده، چې دا کس په څومره بند محکوم شوی دی.
د دوه ښځو په ګډون درې تنه له واده بهر د جنسي اړیکې او نامشروع نکاح په تور د جوزجان ولایت په درزاب ولسوالۍ کې د خلکو په وړاندې له ۱۵ تر ۳۹ پورې دورې وهل شوي دي.
دغه کسان د محکمې د پرېکړې له مخې له یوه تر درې کلونو پورې په تنفذي بند هم محکوم شوي دي.
پنشنبې د (لیندۍ ۲۷ مه) ۱۸ تنه د نشه کوونکو ګولیو او الکولي مشروباتو د پېر، پلور او قاچاق په تور په کابل ولایت کې له ۱۰ تر ۳۰ پورې دورې و وهل شول.
دغه کسان کابل کې د طالبانو د نشه يي توکو او مسکراتو د مخنیوي ابتدایه محکمې له خوا د ۷ میاشتو او درې کلونو تر منځ په تنفذي بند هم محکوم شوي دي.
