کندهار کې سیمه ییز چارواکي وايي، د دې ولایت په خاکرېز ولسوالۍ کې د سخت باران له امله د یوه کور چت پرېوتی، چې په ترڅ کې یې یوې ښځې او دوه ماشومانو ژوند له لاسه ورکړی دی.
رخشانه: کندهار کې د طالبانو د طبعي پېښو سره د مبارزې ادارې رییس عبدالسلام عمري وايي، دغه پېښه د جمعې په شپه (د لیندۍ ۲۸ مه) د خاکرېز ولسوالۍ د «برمو» په سیمه کې رامنځ ته شوې ده.
عمري ویلي، د باران له امله د یوه کور چت رالوېدلي، چې په ترڅ کې یې د یوې ښځې او دوه ماشومانو په ګډون درې تنو ژوند له لاسه ورکړی دی.
هغه د دې کسانو د هویت، عمر او ماشومانو د جنسیت په اړه څه نه دي ویلي.
له تېرې ورځې راپدېخوا د هېواد په یو شمېر ولایتونو کې واورې او بارانونو پیل کړی دی.
هر کال د ژمي او پسرلي په موسمونو کې د ورته پېښو کې لسګونه کسان، په ځانګړې توګه ښځې او ماشومان قرباني کېږي.
د پسرلي په موسم کې د استوګنې ګڼ کورونه د خام والي، زړښت او کلک نه جوړېدو له امله نړېږي.
