بدخشان کې سیمه ییزې سرچینې وايي، د دې ولایت مرکز فیض آباد ښار کې یو تن له خپل زوی سره یو ځای د کوکچې سیند ته لوېدلی او ژوند یې بایللی دی.
رخشانه: فیض آباد ښار کې دوه سرچینو رخشانې رسنۍ ته ویلي، دغه پېښه تېره ورځ (پنشنبې د مرغومي ۴ مه) د بدخشان ولایت مرکز کې رامنځ ته شوې ده.
د سرچینو په وینا، پېښه هغه مهال رامنځ ته شوه، چې یو شپږ کلن ماشوم د کوکچې پر سیند تړلي پله باندې تېرېده او د اوبو منځ ته ولوېده.
سرچینو زیاته کړې، د دې ماشوم پلار د خپل زوی د ژوغورنې لپاره ځان اوبو ته غورځوي، خو د اوبو د ګړندیتوب له امله دواړه ډوبېږي او ژوند له لاسه ورکوي.
د سرچینې د خبرو له مخې، دغه ماشوم له پله د تېرېدو پر مهال د نه «پاملرنې» له امله سیند ته ولوېده.
یوې سرچینې ویلي، دغه سړی اسلام الدین نومېده او د کندوز ولایت اصلي اوسېدونکي، چې په فیض آباد ښار کې یې د خوراکي توکو هټۍ درلوده.
د هغه په وینا، اسلام الدین د خپل کورنۍ یوازینۍ ډوډۍ موندونکی وو.
د دې ماشوم د پلار جسد له اوبو را ایستل شوی، خو د ماشوم جسد تر اوسه نه دی موندل شوی.
سیمه ییز طالب چارواکو تر اوسه د دې پېښې په اړه څه نه دي ویلي.
