د افغانستان د خبریالانو مرکز (AFJC) په یوه راپور کې ویلي، په ۲۰۲۵ کال کې په افغانستان کې د رسنیو له آزادۍ د سرغړونې او تاوتریخوالي لږ تر لږه ۲۰۵ پېښې ثبت شوې دي.
رخشانه: دغه مرکز نن (سه شنبې د مرغومي ۶ مه) د ۲۰۲۵ کال د کلني راپور په خپرولو سره روان کال په هېواد کې د رسنیو او خبریالانو وضعیت خورا تت او محدودونکی اعلان کړی دی.
د خبریالانو مرکز ویلي، د افغانستان رسنیزه فضا روان میلادي کال د طالبانو تر سخت کنټرول او ځپنې لاندې ده.
دغه مرکز زیاته کړې، روان کال دوه خبریالان وژل شوي او درې تنه نور ټپیان شوي دي او په دې موده کې ۱۶۶ ته د ګواښلو پېښې، له هغې جملې ۳۴ پېښې د خبریالانو د نیولو ثبت شوې، چې د هغو پنځه تنه لا هم په زندان کې دي.
د خبریالانو مرکز ویلي، د طالبانو له لوري د زنداني خبریالانو په زور اعتراف خپرول او په خبري ناستو کې د ښځینه خبریالانو د شتون مخنیوی او سانسور د «وېرې، ډار او سخت جنسیتي توپیر د دودولو بېلګې دي، چې تر اوسه یې په هېواد کې مخنیه نه درلوده.»
په راپور کې راوړل شوي، په تېر یوه کال کې په رسنیو کې د ساه کښو انځورونه نه خپرول ۱۷ ولایتونو ته رسېدلي، چې دا په دغه ولایتونو کې د لږ تر لږه ۲۰ تلوېزیونونو د بندېدو سبب شوي او تر اوسه دا قانون په ۲۳ ولایتونو کې پلی شوی دی.
راپور کې راغلي چې «په تېرو دوولسو میاشتو کې دوه نور تلوېزیونونه او دوې راډیوګانې هم د سیاسي یا امنیتي دلایلو له امله تړل شوې او کم شمېر رسنۍ چې پاتې دي، هغه هم له ښځو سره د جنسیتي توپیر بنسټ د تړل کېدو له جدي ګواښ سره مخ دي.»
د افغانستان د خبریالانو مرکز، په افغانستان کې د خبریالانو او رسنیو په وړاندې د دې ډولو پېښو لامل طالبان بولي وايي، دغو پېښو د تېر میلادي کال په پرتله ۱۳ سلنه زیاتوالی موندلی دی.
دغه بنسټ ویلي، طالبانو دولتي رسنۍ په تبلیغاتي او پروپاګند توکو بدل کړي او خپلواکه او آزادې رسنۍ یې ځپلې دي.
د افغانستان د خبریالانو مرکز، د رسنیو او خبریالانو وضعیت د اندېښنې وړ بللی وايي، د خبریالانو او رسنیو په وړاندې د طالبانو محدودیتونو په افغانستان کې د رسنیو او بیان د آزادۍ راتلونکې پراختیا له جدي ګواښونو سره مخ کړې ده.
