د بشري حقونو د فعالانو اتحاد (HRAU) په یوه اعلامیه کې ویلي، افغانستان کې د طالبانو له واک ته رسېدو وروسته، د نجونو منځ کې د ځان وژنې پېښې زیاتې شوې دي.
رخشانه: دغه بنسټ نن (دوشنبې د مرغومي ۸ مه) لیکلي، ۱۶۰۲ ورځې کېږي، چې طالبانو له شپږم ټولګي پورته نجونو پر مخ د ښوونځیو دروازې تړلې دي.
د بشري حقونو د فعالانو اتحاد ویلي، د نجونو پر زده کړه د طالبانو محدودیتونه د دې سبب شوي، چې د نجونو تر منځ د ځان وژنې، اجباري او کم عمر ودونو پېښې زیاتې شي او د څو ښځو درلودل هم په یوه عادي کار باندې بدل شوی دی.
د دې بنسټ په وینا، د دې محدودیتونو له لګېدو وروسته، له ښوونځي او پوهنتون څخه پاتې نجونو تر منځ ناهیلي او ژورخفګان هم زیات شوی دی.
د بشري حقونو د فعالانو اتحاد، په هېواد کې د طالبانو له لوري د نجونو او ښځو پر زده کړه او تحصیل لګول شوي محدودیتونه «کلتوري نسل وژنه» بللې وايي، دغه محدودیتونه کولی شي، د دې ډلې په وړاندې د نویو حقوقي دوسیو د ثبت لامل شي.
دغه بنسټ لیکلي: «طالبانو د نجونو له زده کړې په بې برخې کولو، د هغوی په وړاندې د پوهنتونونو په تړلو، د علمي مضامینو له منځه وړلو، د خپلواکه ښوونکو په لرې کولو، د پوهنتونونو او ښوونځیو څخه د مضامینو په لرې کولو، د ښوونځیو په مدرستو بدلولو، د ښوونیزو پروګرامونو څخه د عصري علومو په له منځه وړلو، د کتابونو په سانسور، په کتابونو د بندیزونو لګولو، د لرغونو آثارو په ویجاړولو، د ملي او سیمه ییزه ژبو د ځپلو او له منځه وړلو او کلتوري جشنونو د مخنیوي له لارې کلتوري نسل وژنه کړې ده.»
د بشري حقونو د فعالانو اتحاد، له نړیوالې ټولنې او نړیوالو بنسټونو غوښتي، چې د طالبانو چلند د کلتوري نسل وژنې په توګه په رسمیت وپېژني او نړیوالو بنسټونو ته د دوسیو د مستند کولو پروسې باید پیاوړې کړي.
