د اورانوس تلوېزیون او کندوز راډیو خبریالې ناظره رشیدي ته نېږدې سرچینې وايي، چې هغه د طالبانو د استخباراتو له لوري نیول شوې ده.
رخشانه: یوې خبرې سرچینې رخشانې رسنۍ ته ویلي، دغه ښځینه خبریاله د سه شنبې په ورځ د (مرغومي ۹ مه) کندوز ښار کې له خپل کوره تر وتلو وروسته نیول شوې ده.
سرچینې زیاته کړې، دې خبریالې «د طالبانو د استخباراتي ځواکونو له لوري تر یوې اړیکې وروسته له کوره وتلې او څو ورځې لپاره ناردکه شوې ده.
سرچینې ویلي، د دې خبریالې د کورنۍ غړي روغتونونو او د طالبانو امنیتي ادارو ته له ورتګ وروسته، د هغې له نیول کېدو خبر شوي دي.
د رخشانې رسنۍ سرچینې، د دې خبریالې د نیول کېدو دلیل د هغې «رسنیز فعالیتونه» بولي.
د سرچینې په وینا، دا سیمه ییزه ښځینه خبریاله، له مخکې څو ځلې د ناپېژانده کسانو له خوا ګواښل شوې وه، تر څو له رسنیزو فعالیتونو لاس په سر شي.
سرچینه وايي، دا خبریاله د دوه ماشومانو مور او د خپلې کورنۍ یوازینۍ ډوډۍ راوړونکې ده.
سرچینې د دې سیمه ییزې خبریالې د جسمي وضعیت په اړه اندېښنه ښودلې او د طالبانو له بند څخه یې د هغو د خوشي کېدو غوښتنه کړې ده. خو د اورانوس تلوېزیون او کندوز راډیو مسوولینو له رخشانې رسنۍ سره په اړیکه کې و ویل، ناظره راشیدي، د دې رسنۍ برحال خبریاله نه ده.
د (احمد په مستعار نوم) د دې رسنۍ یو تن چارواکي ویلي، ناظره رشیدي کلونه مخکې د دې بنسټ کارکوونکې وه، خو اوس هغه د دې رسنۍ برحاله خبریاله نه ده.
تر اوسه کندوز کې سیمه ییزه طالب چارواکو د دې سیمه ییزې ښځینه خبریالې د نیولو په اړه څه نه دي ویلي.
