د هرات جبرئیل ښارګوټي کې ځايي سرچینې وايي، د طالبانو امربالمعروف ځواکونو د تکواندو یوه ښځینه روزونکې له خپل پلار او یوه بل سړي سره یو ځای نیولې ده.
رخشانه: یوې ځايي سرچینې د اصلي هویت پټ ساتلو سره رخشانې رسنۍ ته ویلي، د تکواندو روزونکې خدیجه احمدزاده د سه شنبې په ورځ د «مرغومي ۲۰ مه» د سهار ۸:۳۰ بجې د یوه پټ سپورتی کلب څخه د طالبانو د امربالمعروف ځواکونو له خوا نیول شوې ده.
سرچینې زیاته کړې: «د سه شنبې په ورځ سهار ۷ بجې د طالبانو د امربالمعروب ځواکونه دغه کلب ته ورغلي او په ۸:۳۰ بجو یې هغه نیولې ده. موږ خبر نه وو، چې هغه یې چېرته بېولې، له ډېرو پلټونو او سرګردانۍ وروسته پوه شو، چې زندان کې یې بندي کړې ده.»
د سرچینې په وینا، دا ښځینه روزونکې کابو ۲۲ کلنه ده او نجونو د هغې تر نظر لاندې د تکواندو تمرین کاوه.
د رخشانې رسنۍ سرچینې زیاته کړې، دا روزونکې ښځه هغه مهال نیول شوې، چې نجونو ته یې په «پټه» تمرین ورکاوه.
هغې ویلي دي: «طالبانو د کلب دروازه ټکولې، کله چې چا دروازه نه ده ورته پرانستې، هغوی [طالبانو] له بېرونه غږ پرې کړی، چې موږ ستاسو له روزونکې سره کار لرو. زده کوونکي یې د یوې بلې دروازې څخه له کلبه وتلي، خو طالبانو د هغوی روزونکې له ځان سره یووړه.»
د سرچینې په وینا، دا ښځینه ورزشکاره اوس د هرات مرکزي زندان کې ساتل کېږي او د هغې پلار هم له یوه بل سړي سره یو ځای نیول شوي دي.
سرچینې زیاته کړې، خدیجې دغه پټ کلب د هراتي ښځو او نجونو د سپورت لپاره د زمینې برابرولو په موخه جوړ کړی وو، خو د هغې په نیولو سره یې کورنۍ اندېښنمنه ده.
سرچینې و ویل: «سپورت، چې باید د روغتیا، هیلو او ژوند سمبول وي، په افغانستان کې په یوه جرم بدل شوی. دا یوازې یوه نیونه نه ده، طالبان پرته له کوم دلیله خلک نیسي، پرته له دې، چې کوم وضاحت ورکړي او پرته له دې، چې د خپلو اعمالو مسوولیت ومني.»
په هرات ولایت کې طالبانو تر اوسه په دې اړه غبرګون نه دی ښودلی.
