هرات ښار کې سیمه ییزه سرچینې وايي، په دې ولایت کې ځايي طالب چارواکو په یوه شفاهي امر، د ښځو موټر چلوونه له دې آمله «چې د پېښې پر مهال محرم نه لري» بنده کړې ده.
رخشانه: هرات ښار کې لږ تر لږه درې ښځینه موټرچلوونکو رخشانې رسنۍ ته ویلي، دغه امر تېره ورځ (دوشنبې د مرغومي ۲۹ مه) د طالبانو د امربالمعروف د رییس عزیزالرحمن مهاجر له خوا ورکړل شوی دی.
د سرچینې په وینا، هرات کې د طالبانو د امربالمعروف رییس په یوه ناسته کې، چې له یو شمېر ښځینه موټرچلوونکو سره یې درلوده، هغوی ته ویلي، چې «د پېښې پر مهال د محرم نشتوالي» له امله باید د ښځو موټر چلوونه بنده شي.
یوې موټرچلوونکې ښځې د هویت پټ ساتلو سره رخشانې رسنۍ ته وايي، د طالبانو د امربالمعروف رییس دوی ته ویلي، «ښځې په هېڅ صورت اجازه نه لري، چې د ښار په منځ کې موټر وچلوي.»
هغې زیاته کړې: «[د طالبانو د امربالمعروف رییس] موږ ته و ویل، که ښځې کومه پېښه وکړي، محرم یې له کوم ځایه پیدا کړو؟ هغه مهال محرم له کومه کړو، تر څو د ښځې لاس ونیسي؟»
هرات کې د طالبانو د امربالمعروف رییس ښځې ګواښلې او ویلي یې دي، چې د موټر چلوولو په صورت کې یې موټر دروي او دوی ښايي ونیسي.
دغه موټر چلوونکې ښځې د عزیزالرحمن مهاجر له قوله ویلي دي: «که ښځې د موټر چلوولو کسب وکړي، د نورو ښځو مخ څوک ونیسي؟ که ښځه د موټر د شترنګ تر شاه وه، موټر یې نیول کېږي او خپله به زنداني شي.»
یوې بلې موټر چلوونکې هم ویلي، د موټر د درېدو له وېرې اړ شوه، چې د طالبانو امر پلی کړي. هغې ویلي دي: «په خپل شخصي موټر کې تر کار ځای پورې له ۱۵ تر ۲۵ دقیقو پورې رسېدم، خو اوس، چې ټکسیان مانتو لرونکې ښځې نه پورته کوي او په هر لار کې لیني موټر هم نشته، موږ اړ یو چې ډېری لارې پلې لاړې شو.»
یوې بلې موټرچلوونکې هم د طالبانو دې امر ته غبرګون وښود او ویې ویل، دغه ډله د تازه فرمانونو په ورکولو سره، له ټولینز ژوند څخه د ښځو د ورکولو په لټه کې ده.
هغې و ویل: «زه تولیدي شرکت لرم. د کارونو مسوولیت زما پر خپله غاړه دی. اړ یم، چې په موټر کې تګ راتګ وکړم. خاوند مې ناروغ دی او یوه ورځ تر منځ باید هغه د ډیالېز لپاره روغتون ته یوسم. اوس په دې امر سره زموږ د تګ راتګ لګښت زیاتېږي.»
هرات کې ځايي طالب چارواکو تر اوسه په دې اړه په رسمي توګه څه نه دي ویلي.
