د افغانستان د خبریالانو مرکز (AFJC) د طالبانو د اطلاعاتو او کلتور وزارت له لوري د رسنیو ملاتړو بنسټونو د جواز لغوه کول «د رسنیو د خپلواکۍ قانوني اصولو د بنسټ خلاف» وبلل او هغه یې په کلکه غندلی دی.
رخشانه: دغه بنسټ نن (دوشنبې د سلواغې ۶ مه) د یوې اعلامیې په خپرولو سره ویلي، د طالبانو د اطلاعاتو او کلتور وزارت، د رسنیو د ملاتړ د دریو بنسټونو پرته د لږ تر لږه ۱۰ نورو بنسټونو جوازه لغوه کړي دي.
دغه مرکز لیکلي، طالبانو یوازې «د افغان خبریالانو د خوندیتوب کمېټې، د افغانستان له خبریالانو او رسنیو د ملاتړ بنسټ او افغان مطبوعاتي مرکز» جوازونه تمدید کړي دي.
د طالبانو د اطلاعاتو او کلتور وزارت نن سهار په یوه اعلامیه کې د رسنیو ملاتړو یو شمېر بنسټونو جوازونه د «خبریالانو د شکایت، ډېروالي او د دې بنسټونو د مسوولینو د بې مسلک توب» له امله نه دي تمدید کړي.
دغه وزارت ادعا کړې، چې یاد بنسټونه «د خبریالانو او رسنیو د ستونزو د حل پر ځای د هغوی لپاره ستونزې [جوړې] کړې او په نړیواله کچه یې د افغانستان د رسنیو بنسټونو باور ته زیان رسوولی وو.»
د طالبانو د اطلاعاتو او کلتور وزارت وايي، د رسنیو ملاتړو یوازې درې بنسټونو جوازه یې نوي کړي او نور پاتې بنسټونه لغوه شوي دي. دې وزارت مشخصه کړې نه ده، چې د کومو بنسټونو جوازونه نوي او د کومو هغه لغوه شوي دي.
د افغانستان د خبریالانو مرکز د رسنیو ملاتړ بنسټونو د یوه بنسټ د مسوول له قوله لیکلي، طالبانو د بنسټونو له ارزونې پرته، د هغوی جوازونه لغوه کړي. هغه د طالبانو دا اقدام د خپلواکه بنسټونو ځپل وګڼل.
دې مرکز د طالبانو له لوري د رسنیو ملاتړو بنسټونو د فعالیت جواز لغوه کول د ټولنیزو رسنیو او د رسنیو د خپلواکۍ د بنسټیزو اصولو خلاف وباله او د دې د طالبانو د دې اقدام د پایلو په اړه یې خبرداری ورکړی دی.
د افغانستان د خبریالانو مرکز لیکلي، طالبانو خپلواکه رسنۍ او خبریالان سخت ځپلي او دا ډله د هغو غږونو د غلي کولو په لټه کې دي، چې د دوی له سیاستونو سره جوړ نه راځي.
طالبانو په تېرو څه باندې څلورو کلونو کې، د هېواد پر رسنیو او رسنیزو فعالیتونو د سختو محدودیتونو لګولو سره د یو شمېر رسنیو د بندېدو سبب شوي دي.
دې ډلې په دغه موده کې لسګونه خبریالان، رسنیز کارکوونکي او فعالان نیولي او زنداني کړي دي. په وروستي ځل کابو دوه اوونۍ وړاندې کندوز کې ښځینه خبریاله ناظره رشیدي د طالبانو د استخباراتو له خوا نیول شوې او زنداني شوې ده. تر اوسه د طالبانو له بنده د دې ښځینه خبریالې د خوشي کېدو په اړه کوم خبر په لاس کې نشته.
