ننګرهار کې سیمه ییز طالب چارواکي وايي، د دې ولایت مرکز جلال آباد ښار کې د یوه کور د چت لوېدو پېښه کې یوې مور او شپږو ماشومانو ژوند له لاسه ورکړی او د کورنۍ پلار ټپی شوی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد وايي، پېښه د چهارشنبې په شپه (د سلواغې ۸ مه) ۱۲:۰۰ بجې د جلال آباد ښار د اوومې ناحیې په «غوچکو» سیمه کې رامنځ ته شوې ده.
د حماد په وینا، د یوه دوه پوړیزه کور چت چې د «اوبو د ویالې» تر څنګ یې موقعیت درلود او له دې وړاندې هم د اوبو نفوذ له کبله زیانمنه شوې وه، نړېدلی دی.
هغه زیاته کړې، چې د دې کور د چت لوېدو په پایله کې د یادې کورنۍ ۸ تنه غړي تر خاورو لاندې وو، چې په ترڅ کې یې یوې مور او د هغې شپږو ماشومانو ژوند له لاسه ورکړی او د کورنۍ پلار ټپي شوی دی.
د ټپي کس د روغتیايي حالت په اړه معلومات په لاس کې نشته.
ننګرهار کې یوې سرچینې د هویت پټ ساتلو سره ویلي «د شپې کابو ۱۲ بجې وې، چې ناڅاپه مې د [یوه شي] د ماتېدلو اواز واورېده او په بېړه مې ځان سیمې ته ورساوه. کله چې هلته ورسېدم ومې لیدل، چې د تره زامن مې ژوندي دي او نورو ټولو ژوند له لاسه ورکړی دی. له هغوی مو درې ته صحت روغتون ته او څلور تنه نور مو فاطمه الزهرا روغتون ته یووړل.»
د سرچینې په وینا، د مړو شویو کسانو په منځ کې درې هلکان، درې نجونې او یوه ښځه شامله ده.
له تېرې اوونۍ راهیسې د هېواد ډېری ولایتونه د واورې او بارانونو شاهد وو.
