د رسنیو په وړاندې د طالبانو د محدودیتونو پر دوام، د افغانستان د خبریالانو مرکز(AFJC) اعلان کړی، چې کاپیسا ولایت کې هم د ساه کښو په انځور خپرولو بندیز ولګېد.
رخشانه: دې مرکز نن (پنشنبې د سلواغې ۹ مه) په یوه اعلامیه کې لیکلي، دا محدودیتونه کاپیسا کې د طالبانو د امربالمعروف ریاست له خوا لګول شوی دی.
د افغانستان د خبریالانو مرکز ویلي، کاپیسا کې د طالبانو د اطلاعاتو او کلتور د رییس په امر، د دې ولایت خبریالان باید انځور ونخلي او تصوري مرکې تر سره نه کړي.
کاپیسا پنځه ویشتم ولایت دی، چې په کې په رسنیو کې د ساه کښو انځور خپرول په جدي او رسمي توګه د طالبانو له لوري منع شوی دی.
د افغانستان د خبریالانو مرکز وايي، د دې محدودیت په ترڅ کې د کاپیسا ملي تلوېزیون په راډیو بدل شوی او په دې ولایت کې خصوصي رسنۍ نورې هم محدودې شوې دي.
د دې مرکز په وینا، د ساه کښو په انځور خپرولو بندیز د صدای نجراب، ندای حقیقت او طنین صدا راډیوګانو پر فعالیت هم اغېز کړی دی.
له دې وړاندې، په کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندوز، بامیان، دایکنډي، فاریاب، پنجشېر، لغمان، سرپل، بلخ، هرات، پکتیا او اروزګان ولایتونو کې د ساه کښو په انځور خپرولو بندیز لګول شوی وو.
د افغانستان د خبریالانو مرکز، په رسنیو کې د ساه کښو د انځور په خپرولو محدودیت غندلی وايي، دا بندیز اطلاعاتو ته د خلکو لاسرسی، چې له وړاندې ډېر محدود شوی وو، نور سختوي.
دې مرکز له طالبانو غوښتي، چې د دې امر په بیا کتنې او لغوه کولو سره، د رسنیو لپاره د خپلواکه او له وېرې پرته فعالیت چاپېریال برابر کاندي.
د بیان د آزادۍ مرکز د تلوېزیون د نړیوالې ورځې په مناسبت ویلي وو، طالبانو په تېرو څلورو کلونو کې د خصوصي تلوېزیونونو په تړاو ۲۳ لارښوونې صادرې کړې او په تېر یوه کال کې لږ تر لږه ۱۵ تلوېزیونونه د طالب چارواکو په نېغ امر تړل شوي دي.
طالبانو په تېرو څه باندې څلورو کلونو کې، د رسنیو او رسنیزو فعالیتونو په وړاندې د سختو محدودیتونو په لګولو سره، د لسګونه، غږیزو، تصویري او چاپي رسنیو د تړل کېدو لامل شوي او څو تنه خبریالان، رسنیز کارکوونکي او فعالان یې نیولي او زنداني کړي دي.
