د طالبانو د محکمو جزايي اصول نامې توشېح ته د غبرګونو پر دوام د افغانستان د ځواکمنو ښځو غورځنګ غړې وايي، دې سند د پراخه کورني تاوتریخوالي، جبري ودونو او تاوتریخوالي د عاملینو د خوندیتوب د زیاتوالي زمینه برابره کړې ده.
رخشانه: د دې اعتراضي غورځنګ غړو نن (دوشنبې د سلواغې ۱۳ مه) د یوې تمثیلي ټوټې په وړاندې کولو سره، د طالبانو د محکمو جزايي اصول نامې ته غبرګون وښود.
معترضو ښځو د تمثیلي ټوټې په وړاندې کولو سره پر افغان ښځو په ځانګړې توګه د ښځو په وړاندې د کورني تاوتریخوالي د زیاتېدو په اړه د طالبانو د محدودیتونو پایلې روښانه کړې.
دوی ویل، د طالبانو د محکمو جزايي اصول نامه «له ښځو د قانوني ملاتړ له منځه وړلو، عدلي بنسټونو ته د ورتګ مخنیوي او د ښځو د ټولینز حضور محدودولو، د کورني تاوتریخوالي پراخېدو، جبري ودونو او د تاوتریخوالي د عاملینو د خوندیتوب زیاتېدو ته زمینه برابره کړې ده.»
د افغان ځواکمنو ښځو غورځنګ غړو ټینګار کړیو چې «په ټولنه کې د ښځو غږ غلي کول، له عمومي چاپېریال څخه، کور ته د ننه د تاوتریخوالي د لېږدولو په مانا دی.»
دوی له نړیوالې ټولنې او بشري حقونو له بنسټونو غوښتي، چې د دې وضعیت په اړه عملي غبرګونونه وښي.
د طالبانو د محکمو جزايي اصول نامه تازه د دې ډلې د مشر ملا هبت الله اخوندزاده له خوا توشېح شوې ده.
د دې سند غیر رسمي توشېح او خپرېدو د بشري حقونو د بنسټونو او نړیوالې ټولنې تر منځ پراخ غبرګونونه راپورته کړي دي.
د بشري حقونو فعالانو دا قانون د نړیوالو اصولو او کړنلارو خلاف بللی او ویلي یې دي، طالبان د دې قانون په توشېح کولو سره خپلو جرمونو ته د مشروعیت موندلو په لټه کې دي.
