کندهار کې سیمه ییزې سرچینې وايي، د درې ښځو جسدونه چې ډېرې «بې رحمانه» وژل شوې، د دې ولایت په سپین بولک ولسوالۍ کې موندل شوي دي.
رخشانه: دغه جسدونه نن (دوشنبې د سلواغې ۱۳ مه) د سپین بولدک د شپږمې ناحیې اړوند د «سارګو» غره ته نېږدې موندل شوي دي.
یوې سرچینې د هویت پټ ساتلو سره رخشانې رسنۍ ته ویلي، د دې ښځو جسدونه په یوه «بوجۍ» کې اچول شوي او وروسته خښ کړای شوي وو.
د سرچینې په وینا، د نښو له مخې دغه درې مېرمنې څه موده وړاندې وژل شوې دي.
د دې ښځو د جسدونو انځورونه چې رخشانې رسنۍ تر لاسه کړي ښيي، چې جسدونه په بشپړه توګه وراسته شوي او د پېژندلو وړ نه دي.
هغې زیاته کړې، طالبانو د دې ښځو جسدونه د پېژندنې او د خپلوانو د پیدا کولو په موخه سپین بولدک ولسوالۍ کې دولتي روغتون ته لېږدولي دي.
د وژل شویو مېرمنو هویت او د وژنې انګېزه تر اوسه نه ده روښانه.
کندهار کې ځايي طالب چارواکو هم تر اوسه د دې جسدونو د کشف په اړه څه نه دي ویلي.
واک ته د طالبانو تر بیا رسېدو وروسته، په هېواد کې مرموزې وژنې او جنايي پېښې په بې مخینې توګه زیاتې شوې دي.
