د افغان ښځو د همت اعتراضي غورځنګ د طالبانو جزايي اصول نامې ته په غبرګون کې پر نړیوالې ټولنې غږ کړی، چې د کاغذ پر مخ خواخوږۍ، په کنفرانسو کې اوښکو او په عمل کې چوپتیا هېڅ یوه ښځه نه ده ژغورلې.
رخشانه: د دې اعتراضي غورځنګ غړو نن (چهارشنبې د سلواغې ۱۵ مه) د یوې تمثیلي ټوټې په وړاندې کولو سره د طالبانو د محکمو جزايي اصول نامه د بشري حقونو او ښځو د حقونو ضد وبلله او هغه یې په کلکه وغندله.
دوی دغه سند په څرګنده توګه د بشري حقونو او ښځو د حقونو ضد سند وباله، چې په سیستماتیک ډول د منځنۍ او ټيټې کچې ښځې د توپیري او طبقاتي چلند سره مخ کوي.
معترضو ښځو ویلي دي، دا سند د افغان وکړو په وړاندې هېڅ مشروعیت او اعتبار نه لري او بشري تاوتریخوالي، په ځانګړې توګه د ښځو په وړاندې تاوتریخوالی قانوني او عادي کوي.
هغوی ټینګار کړي، چې د طالبانو د محکمو په جزايي اصول نامه کې، د تاوتریخوالي د عامل پر ځای قرباني مجرم پېژندل شوی، چې د واکمن ښځې ځپوونکي نظام ماهیت او د ظلم او بې عدالتۍ بنسټیز کول په روښانه توګه افشا کوي.
د افغان ښځو د همت غورځنګ غړو ویلي، دا سند نه یوازې د اسلامي او انساني اخلاقي عدالت سره په ټکر کې دی، بلکې له قانون څخه د ښځو د ځپوونکې وسیلې په توګه کار اخلي.
دوی له نړیوالې ټولنې او ملګرو ملتونو غوښتي، چې د افغان ښځو ملاتړ وړي او وايي «د نړیوالې تولنې او ملګرو ملتونو بې اغېزې بیانیې او دوکه کوونکې ژمنې نه منو. د کاغذ پر مخ خواخوږۍ، په کنفرانسو کې اوښکو او په عمل کې چوپتیا هېڅ یوه ښځه نه ده ژغورلې.»
د طالبانو د مشر له خوا د دې ډلې د محکمو د جزايي اصول نامې غیر رسمي توشېح، د بشري حقونو د بنسټونو، معترضو ښځو او بشري حقونو د فعالانو اندېښنې راپورته کړې دي. هغوی دا سند د بشري حقونو د بنسټیزو اصولو پر عکس بللی دی.
