د بدخشان ولایت ارغنج خواه ولسوالۍ کې د یوې ترافیکي پېښې له امله، د شپږو ماشومانو، پنځو ښځو او څلورو نارینه وو په ګډون ۱۵ تنو ته مرګ ژوبله واوښته.
رخشانه: بدخشان کې د طالبانو د امنیه قوماندانۍ ویاند احسان الله کامګار ځايي رسنیو ته ویلي، دغه پېښه نن (شنبې د سلواغې ۱۸ مه) ماسپښین مهال د ارغنج خواه ولسوالۍ په «سمدره» سیمه کې رامنځ ته شوې ده.
نوموړي ویلي، یو عراده «فلانکوچ ډول موټر» د سړک د سخت خرابوالي له امله اوښتی او سیند ته لوېدلی دی.
د ده په وینا، د دې پېښې په ترڅ کې شپږو ماشومانو، پنځو ښځو او څلورو نارینه وو ژوند بایللی او درې تنه نور سخت ټپیان شوي دي.
د پېښې ټپیان روغتیايي مرکز ته د درملنې په موخه لېږدول شوي او د څو تنو روغتیايي حالت نازک ښودل شوی دی.
بدخشان کې د طالبانو د امنیه قوماندانۍ ویاند د دې پېښې د ټپیانو د هویت، سن او جنسیت په اړه څه نه دي ویلي.
دا موټر د بدخشان ولایت له مرکز فیض آباد ښار څخه د ارغنج خواه ولسوالۍ پر لور د حرکت په حال کې وو، چې دا پېښه رامنځ ته شوې ده.
