د جګړې له مهاله پاتې د یوه پخواني لاسي بم چاودنې د بادغیس ولایت په سنګ آتش ولسوالۍ کې د یو لس ماشوم ژوند له لاسه ورکړی او یو بل ماشوم ټپي شوی دی.
رخشانه: بادغیس کې د طالبانو د امنیه قوماندانۍ ویاند صدیق الله صدیقي ویلي، دغه پېښه نن (شنبې د سلواغې ۱۸ مه) ماسپښین مهال د سنګ آتش ولسوالۍ په «لودینان» سیمه کې رامنځ ته شوې ده.
صدیقي وايي، پېښه هغه مهال رامنځ ته شوې، چې د جګړې د مهال یو لاسي بم ماشومانو موندلی دی.
هغه زیاته کړې، دې ماشوم د لاسي بم له موندلو وروسته په هغه لوبې کولې، چې پر مهال یې چاودنه کړې ده.
د دې چاودنې په ترڅ کې یو لس کلن ماشوم ژوند له لاسه ورکړی او یو بل ماشوم ټپي شوی دی.
د ټپي ماشوم د هویت، عمر او جنسیت په اړه جزیات په لاس کې نشته.
په افغانستان کې د ملګرو ملتونو د سیاسي استازولۍ دفتر (یوناما) د تېرې اوونۍ د سه شنبې په ورځ اعلان وکړ، چې په افغانستان کې د ماینونو او ناچاودو توکو ۸۰ سلنه قربانیان ماشوم دي.
دې بنسټ ویلي وو، افغانستان د نړۍ پر مخ د ناچاودو توکو د چاودنو له امله د مرګ ژوبلې درېیم لوړه درجه هېواد دی.
د ملګرو ملتونو سیاسي استازولی زیاته کړې، افغانستان کې لا هم د جګړو د مهال ماینونه او ناچاودي توکي په پراخه کچه شتون لري.
په هېواد کې ناچاودي توکي، ماینونه او د جګړې د مهال پاتې جګړیز توکي هر کال د سلګونو وګړو په ځانګړې توګه د ماشومانو او ښځو ژوند اخلي.
