طالبانو یوه ماشومه نجلۍ چې له درې کلونو راهیسې یې د هلکانو جامې اغوستې او د هلک په نوم یې په یوه رستورانت کې کار کاوه، نیولې ده.
رخشانه: د دې نجلۍ د نیولو او پلټنو ویډو تازه په خواله رسنیو کې لاس په لاس کېږي.
د دې ماشومې نجلۍ اصلي نوم نوریه او د هلک په نوم بدل نوم یې نور احمد او پلار یې محمد ګل نومېږي.
دا وايي، اصلي د غور ولایت اوسېدونکې ده او درې کاله کېږي، چې د هلکانو د جامو په اغوستلو او د هلک په نوم له حکمت الله نومي سره په هوټل کې د میاشتې په اووه زره تنخوا کار کوي.
دا ماشومه نجلۍ په دې ویډیو کې وايي، چې د بېوزلۍ او ناچارۍ «مجبوریت» له امله د هلکانو جامې اغوستې تر څو کار وکړي.
د دې ویډیو د ثبت دقیق ځای او وخت په دې ویډیو کې معلوم نه دی او د دې نجلۍ له برخلیک څخه هم کوم خبر په لاس کې نشته.
د طالبانو له لوري د دې ماشومې نجلۍ د نیول کېدو او پلټو ویډیو په خواله رسنیو پراخ غبرګونونه راپارولي دي. د بشري حقونو فعالان او د ماشومانو د حقونو مدافعین، د دې ویډیو خپرېدل او د دې نجلۍ نیول او له هغې پلټنې، د افغان ښځو د «ناوریني» وضعیت بېلګه بولي.
شاعرې او خبریالې لینا روزبه حیدري د دې ویډیو خپرېدل او د طالبانو له لوري د دې نجلۍ نیولو او ترې پلټنو په اړه په خپله اېکس پاڼه لیکلي، هغه یې په افغانستان کې د «میلیونونو نجونو بېلګه» چې طالبان هغوی ته د کار اجازه نه ورکوي، بللې.
هغې لیکلي دي: «نوریه نوریه د هغه خاورې د میلیونونو نجونو بېلګه ده، چې د خپلې کورنۍ یوازینۍ ډوډۍ راوړونکې ده او دا ډول باید د لوږې له امله چې طالبان د کار اجازه هغوی ته نه ورکوي، مړه شي.»
