کندوز کې سیمه ییزې خبریالې ناظره رشیدي ته نېږدې سرچینې وايي، دغه خبریاله ښځه له یوې میاشتې وروسته د طالبانو له زندانه خوشې شوې ده.
رخشانه: یوې خبرې سرچینې رخشانې رسنۍ ته ویلي، مېرمن رشیدي چهارشنبې د (سلواغې ۱۵ مه) له زندان نه خوشې شوې ده.
سرچینې په دې اړه، چې ولې ناظره د طالبانو له لوري نیول شوې وه، د امنیتي ننګونو له امله جزیات نه دي ورکړي.
ناظره رشیدي د (مرغومي ۱۶ مه) د سه شنبې په ورځ، په کندوز ښار کې له خپل کور څخه تر وتو وروسته، د طالبانو د استخباراتو له خوا نیول شوې وه.
هغه مهال د دې ښځینه خبریالې یو له خپلوانو رخشانې رسنۍ ته ویلي وو، چې هغه د خپلو «رسنیو فعالیتونو» له امله نیول شوې ده.
کندوز کې د طالبانو امنیه قوماندانۍ د سیمه ییزې خبریالې د ناظره رشیدي د نیولو خبر یوه اوونۍ وروسته تایید کړ او ادعا یې کړې وه، چې هغه او څلور تنه نورې ښځې د یوې جنايي پېښې له امله نیول شوې دي.
د دې سیمه ییزې ښځینه خبریالې نیولو په خواله رسنیو پراخ غبرګونونه له ځان سره لرل. د بشري حقونو فعالانو، معترضو ښځو او د خبریالانو د ملاتړ بنسټونو، د طالبانو له بنده د هغې د خوشي کېدو غوښتوونکي وو.
طالبانو په څه باندې څلورو کلونو کې پر رسنیو د محدودیتونو لګولو سربېره، یو شمېر خبریالان، رسنیز کارکوونکي او فعالان نیولي او زنداني کړي دي.
