یوې ځوانې ښځې د ننګرهار ولایت مرکز جلال آباد ښار کې د خوراکي توکو، لکه اچار، مربا او کېچپ د تولید فابریکه جوړه کړه، تر څو ښځو ته د کار زمینه برابره شي.
رخشانه: د شبنم ساپۍ په نوم دغه ۲۲ کلنې ښځې، یاده کارخونه په جلال آباد ښار کې په لار اچولې ده.
شبنم وايي، دا فابریکه یې داخلي تولیداتو ته د ارزښت ورکولو او اړمنو ښځو ته د کار او کسب زمینې برابرولو په موخه جوړه کړې ده.
د شبنم په وینا، دمګړۍ په دې فابریکه کې له دې سره لس ښځې او ځوانې نجونې په کار بوختې دي.
دغه نوښتګره مېرمن له طالبانو غواړي، چې د داخلي او بهرنۍ بازارموندنې برخه کې ورسره همکاري وکړي، تر څو وکولی شي، خپل تولیدات پراخه کړي او لا زیاتې مېرمنې په کار وګماري.
د دې فابریکې دوې کارکوونکې کلثوم او روبینا خوښې دي، چې دلته په کار بوختې دي. کلثوم و ویل: «دا چې کولی شم دلته کار وکړم او له خپلې کورنۍ سره مرسته وکړم خوښه یم.»
په دې کارخونه کې په کار اخته مېرمنې له طالبانو غواړي، چې ښځو ته په بېلا بېلو برخو کې د کار فرصتونه او وړ اسانتیاوې رامنځ ته کړي.
طالبانو په تېرو څه باندې څلورو کلونو کې د ښځو په وړاندې د پراخو محدودیتونو په لګولو سره، هغوی په دولتي ادارو، کورنیو او بهرنیو موسسو او خصوصي سکتور کې له کار کولو راګرځولې دي.
په دولتي او خصوصي ادارو کې یو شمېر په کار بوختې مېرمنې، چې د دې محدودیتونو د لګولو وروسته په کور ناستې وې، په خصوصي سکتور کې په پانګونې لاس پورې کړی دی.
څه موده وړاندې یو شمېر سوداګرو مېرمنو د هرات ولایت په مرکز هرات ښار کې د ښځو لپاره ځانګړی سوداګریز مرکز جوړ کړی وو.
