په افغانستان کې د ملګرو ملتونو د سیاسي استازولۍ دفتر (یوناما) اعلان کړی، چې له ښوونځي نجونو محرومیت د افغانستان د دردناکې راتلونکې انځور ښيي.
رخشانه: دغه بنسټ نن (چهارشنبې د سلواغې ۲۲ مه) په «ساینس کې د ښځو او نجونو» نړیوالې ورځې سره سم، په خپله اېکس پاڼه لیکلي، ۱۶۰۷ ورځې کېږي، چې طالبانو له شپږم ټولګي پورته نجونو پر مخ د ښوونځیو دروازې تړلې دي.
یوناما په دې اړه لیکلي« محرومیت او له لاسه وتلي فرصتونه د افغانستان د دردناکې راتلونکې انځور ښيي، هغه راتلونکې، چې په کې نجونې او ښځې د علومو او نورو حیاتي برخو کې حضور نه لري.»
د ملګرو ملتونو دې بنسټ زیاته کړې چې په «ژورې خواشینۍ» سره دغه ورځ لمانځ او له طالبانو غواړي، چې دا محدودیت لغوه کړي.
ملګرو ملتونو (UN) پورې تړلې اېکس پاڼې هم د «نړۍ کې د بشريت د پرمختګ او راتلونکې د جوړلو» لپاره د ښځو او نجونو پر حیاتي رول ټینګار کړی دی.
دغه بنسټ لیکلي «له څلورو کلونو زیاته موده کېږي، چې افغانستان کې ښځې او نجونې له زده کړو او کار څخه منع کړای شوې دي، دغه محرومیت نه یوازې دوی څنډې ته کړې، بلکې د هېواد د پرمختګ او پراختیا مخنیوی یې هم کړی دی.»
ملګرو ملتونو یو ځل بیا له طالبانو غوښتي، چې له شپږم ټولګي پورته نجونو باندې د زده کړو بندیز لغوه کړي.
افغانستان کې د اروپايي ټولنې دفتر هم ویلي، چې په ساینس کې د ښځو او نجونو نړیواله ورځ لمانځي.
دې بنټ زیاته کړې، ښځې او نجونې «له نرسانو او قابلو نیولې، تر څېړونکو پورې د هغوی فعالیت، د یوه روغ او پر خپلو پښو ولاړ افغانستان لپاره حیاتي دي.
د اروپايي ټولنې دفتر په افغانستان کې د ښځو او نجونو د زده کړو پر ملاتړ ټینګار کړی او ویلي یې دي «ښځې باید د علم په چوکاټ کې وي.»
د طالبانو مشر د ۲۰۲۱ کال د سپټمر په ۱۷ مه، د یوه فرمان په ترڅ کې له شپږم پورته نجونو پر مخ د ښوونځي دروازې وتړلې. د طالبانو د مشر دغه فرمان په نړیواله کچه غبرګونونه له ځان سره درلودل.
طالبانو په افغانستان کې د خپلې واکمنۍ له څلورو کلونو په زیاته موده، تر اوسه د نجونو پر مخ د ښوونځیو د خلاصون په اړه اقدام نه دی کړي. همدارنګه دغه ډلې په پوهنتونونو کې هم د نجونو په زده کړو بندیز ته د پای ټکی نه دی اېښی.
