ديد امریکا متحده ایالاتو د بهرنیو چارو وزارت پخوانۍ وزیرې هېلاري کلېنټون ویلي، په نړۍ کې د ښځو د ځپلو تر ټولو سخته بېلګه طالبانو په افغانستان کې روانه کړې ده.
رخشانه: د مېرمن کلېنټون مقاله د «ښځو حقونه، دموکراتیک حقونه دي» تر عنوان لاندې تازه په «Foreign Affairs» ورځپاڼه کې خپره شوې ده.
هغې په خپله مقاله کې لیکلي، په افغانستان کې د طالبانو له بیا واک ته رسېدو وروسته ښځې پوهنتون ته له تګ، په دولتي ادارو کې له کار کولو او مسلکي فعالیتونو منع شوې او نجونې له منځنۍ زده کړو محرومې شوې دي.
کلېنتون لیکلي، طالبان د اسلامي ارزښتونو او ملي هویت د خوندیتوب په ادعا سره دغه محدودیتونه پر ښځو لګولي، خو د هغوی اصلي هدف، دا دی، چې ښخې معلوماتو، عاید او سیاسي نفوذ ته له لاسرسي محرومې کړي او د عامه ځایونو څخه د نفوس نیمايي برخې له منځه وړلو سره خپل کنټرول ټینګ کړي.
نوموړې خبردای ورکړ چې د نورو استبدادي رژیمونو مشران هم له دې کړنلارو زده کړه کوي، تر څو په ټولنه ډېر کنټرول ولري. هغه د ایران، چین، روسیې او پولنډ په څېر هېوادونو کې د واکمنو کړنلارو ته اشاره کړې، چېرې چې ښځې له عامه ساحې ایستل کېږي یا تر فشار لاندې راوستل کېږي.
کلېنټون لیکلي، استبدادي رژیمونه په منظمه توګه د ښځو حقونه کمزوري کوي، ځکه پوهېږي، چې د ښځو ګډون د دموکراسۍ محرک دی او هم د استبداد پر وړاندې خنډ، دا ځپنه هم ایډیولوژیکه هم هم تکتیکي ده.
د امریکا پخوانۍ د بهرنیو چارو وزیرې ټینګار کړي، چې «په ټولو کلتورونو او براعظمونو کې ښخې د دموکراسۍ ملاتړې دي او استبداد کوونکي هغوی د واک د راټولولو لپاره د ستراتېژۍ د یوې برخې په توګه په نښه کوي.»
هغې ویلي، نن ورځ په ټوله نړۍ کې د ښځو پر حقونو، فرصتونو او په ټولنه کې د بشپړ ګډون برید په ښکاره له پامه غورځول شوی دی او «د یوه اصلي بحران په توګه د ښځو سره ظلم له پامه غورځول په حقیقت کې تضمینوي، چې د دیموکراسۍ تخریب به بې کنټروله دوام ولري.
کلېنټون دود، د ښځو د ځپلو لپاره د یوې وسیلې په توګه بیان کړی او ویلي یې دي «ډېری استبدادي واکمنان د کورنۍ ارزښتونو، کلتوري دود، مذهب او ملي هویت د دفاع په توګه د ښځو خپل توجېه کوي، یوه داسې تګلاره چې په ټولنیزه او اخلاقي توګه انګازې کوي او د استبدادي ځواک مشروعیت پیاوړی کوي.»
