د ارپايي ټولنې د پارلمان غړې هانا نیومن وايي، دغه ټولنه باید د طالبانو د جنسیتي توپیر د سیستم په اړه غبرګون وښي، ځکه د هغې په وړاندې چوپتیا، له دې ډلې سره ملګرتیا ده.
رخشانه: مېرمن نیومن نن (چهارشنبې د کب ۶ مه) په اېکس پاڼه د یوې وینا په خپرولو سره ویلي، قانون باید له خلکو ساتنه وکړي، خو اوس په افغانستان کې قانون د غلامۍ او له عمومي صحنې څخه د ښځو د لرې کولو لپاره کارول کېږي.
مېرمن نیومن د طالبانو د جزايي اصول نامې په تړاو، چې په دې وروستیو کې توشېح شوې ویلي، دا نوې اصول نامه ډېره وحشتناکه موضوع څرګندوي، هغه دا چې ښځې په ټول افغانستان کې، نه په کارو نه په ښوونځي او نه په ټولنیز ژوند کې په رسمي ډول برابر حق نه لري.
هغې ویلي: «ښځې له کاره ګرځول شوې، نجونې له زده کړو محرومې دي او هېڅ یوه نه شي کولی له محرم پرته تګ راتګ وکړي. دا یوازې محدودیت نه دی، دې د هغوی خپلواکي له منځه وړې او له غلامۍ دفاع کوي.»
مېرمن نیومن ټينګار کوي، چې د طالبانو د نوي قانون ځینې ناڅرګند برخو اخلاقي مسایل په جرم اړولي او اوس ان خبرې کول او له کوره وتل هم جرم ګڼل کېږي او جرمونو د خلکو په وړاندې له دورو وهلو، وهلو ټکولو او ان زنداني کولو سره مل دي.
د اروپايي ټولنې د دې غړې په وینا، د طالبانو دا قانون د دې لپاره نه دی، چې له ټولنې ساتنه وکړي، بلکې یوازې د دې لپاره دی، چې خلک اطاعت کولو ته چمتو کړي.
مېرمن نیومن وايي، هغه څه چې طالبان یې افغانستان کې تر سره کوي، د کلتور او دین مسله نه ده، بلکې جنسیتي توپیر یو قانوني سیستم دی او اروپايي ټولنه باید ځواب ورکړي.
هغې زیاته کړې: «دا د کلتور مسله نه ده، دیني مسله هم نه ده، دا د جنسیتي توپیر یو قانوني سیستم دی او اروپايي ټولنه باید ځواب ورکړي. د مسوولو کسانو په وړاندې د بندیزونو په نښه کولو او په پای کې د جنسیتي توپیر د انسانیت ضد جرم په توګه پېژندلو او د افغان ښځو او نجونو په ملاتړ کولو سره. ځکه چوپتیا بې پرېتوب نه دی، دا په جرم کې ګډون دی.»
دا غبرګون پر داسې حال رامنځ ته کېږي، چې تېره ورځ د ملګرو ملتونو د عمومي اسامبلې مشرې آنالنا بربوک، د دې سازمان د بشري حقونو شورا په ۶۱ مه ناسته کې، د طالبانو له لوري د ښځو او نجونو د حقونو د سرغړاوي په وړاندې د زغم سیاست په اړه خبرداری ورکړ.
هغې زیاته کړه، نه باید دا تریخ درس بیا زده کړو، چې د ښځوحقونو د یوې ټولنې یا ان د نړۍ د وضعیت د سنجولو معیار دی.
مېرمن بربوک ویلي، که چېرې مېرمن د نړۍ د نیم نفوس، یعنې څلور میلیارد انسانان په امنیت کې نه وي، هېڅوک به په امنیت کې نه وي.
نوموړې د بشري او ښځو د حقونو په برخه کې سخت شاه تګ ته په اشارې سره د ملګرو ملتونو له غړو د اقدام غوښتنه وکړه.
