په افغانستان کې د ملګرو ملتونو سیاسي استازولۍ (یوناما) اعلان کړی، چې د راستنو شویو افغان کډوالو شاوخوا یو په درېیمه برخه ښځې او ماشومان دي.
رخشانه: دغه بنسټ نن (چهارشنبې د کب ۶ مه) په خپله فسبوک پاڼه د یوې خبرپاڼې په خپرولو سره لیکلي، په تېرو دوه کلونو کې کابو ۵ میلیونه وګړي، چې هېواد د نفوس نېږدې ۱۰ سلنه جوړوي، افغانستان ته راستانه شوي دي.
د یوناما په راپور کې راغلي، دغه رجحان تر ډېره د ګاونډیو هېوادونو څخه د اجباري کډه کولو او د کډوالۍ د سختو محدودیتونو د پلي کېدو له آمله رامنځ ته شوی دی.
په راپور کې ویل شوي، یوازې په ۲۰۲۵ میلادي کال کې کابو ۲.۷۸ میلیونه افغان وګړي هېواد ته راستانه شوي، چې ډېری یې له ایران څخه شاوخوا (۱.۸۸ تنه) او له پاکستان څخه (۸۹۹ زره تنه) دي.
د یوناما په وینا، له ایران او پاکستانه د رایستل شویو کډوالو څخه ۲.۳ میلیونه تنو رسمي اسناد نه درلود او ۴۸۴ زره کسان د باوري اسنادو لرونکي وو.
د ملګرو ملتونو سیاسي استازولۍ ویلي، ښځې، نجونې او ماشومان تر ډېره له زیات خطر سره مخ دي. د راستنو شویو کډوالو کابو یو په درېیمه برخه ښځې او نجونې دي.
یوناما ټینګار کړی، چې تر ۱۷ کلنۍ ټیټ عمره په ځانګړې توګه بې سرپرسته او له کورنیو جلا شوي ماشومان، د خوندیتوب بېړني ملاتړ، د کورنیو د موندلو خدماتو او رواني- ټولنیز ملاتړ ته اړتیا لري.
ملګرو ملتونو او مرستندویه بشري بنسټونو د بېړنیو مرستو د چمتو کولو لپاره د همغږۍ هڅې ګړندۍ کړې دي. خو له دې سره سره بحران له شته ظرفیت څخه څو برابره لوی دی. د بودیجې سخت کمښت د دې لامل شوی، چې مرستې ټولو اړمنو کسانو ته بسندویه نه وي.
یوناما د سرپناه په برابرولو، د خوړو د خوندیتوب پیاوړتیا، د استوګنې ملاړ او د دوامداره بیا یو ځای کېدو پروګرامونو پلي کولو باندې ټینګار کړی او ویلي یې دي، د اوږد مهاله ملاتړ نشتوالی د زیان مننې او ټولنیزې بې ثباتۍ ګواښ زیاتوي.
