د افغانستان د رسنیو د ملاتړ سازمان (AMSO) کې د ښځینه خبریالانو د ملاتړ کمېټې اجرائیوي مشره شګوفه دانش وايي، افغان ښځې او خبریالانې له زیاتېدونکو محدودیتونو سره مخ دي.
رخشانه: دانش دغه څرګندونې تېره ورځ (پنشنبې د کب ۷ مه) د ملګرو ملتونو امنیت شورا په ۶۱ مه غونډه کې بیان کړې او په افغانستان کې یې د بشري حقونو د ماتېدا او بیان پر آزادۍ د محدودیتونو پراختیا په اړه خبرداری ورکړی دی.
هغه په دې ناسته کې د بشري حقونو د عالي کمېشنرۍ او د افغانستان د بشري حقونو لپاره د ملګرو ملتونو ځانګړي راپور ورکوونکي له راپورونو هرکلی وکړ او د دې راپورونو موندنې یې سختې اندېښمنوونکې وبللې.
دانش پر دوام زیاته کړې، د طالبانو تر واک لاندې افغانستان کې د ښځو په وړاندې د تبعیض بنسټیزه کېدو، زده کړو، روغتیايي خدماتو، کار او اساسي حقونو ته د هغوی لاسرسی په سیستماتیک ډول محدود کړی دی.
د هغې په وینا، افغانستان کې د رسنیو کارکوونکي له ۲۴ زیاتو محدودونکو لارښونو سره مخ دي، ښځینه خبریالانې تر ټولو ډېر مسلکي فشارونه او محرومیتونه تجربه کوي، هغه وضعیت چې د نوموړې په وینا، د بیان آزادۍ او عمومي اطلاعاتو ته یې لاسرسی سخت کمزوری کړی دی.
مېرمن دانش دغه راز له افغانستان سره د نړیوالو مرستو کمښت د بشر دوستانه بحران او د بشري حقونو د وضعیت لا خرابېدا لامل وباله.
هغې «په افغانستان کې د بشري حقونو د سرغړونو د څېړلو لپاره د یوه خپلواک تحقیقاتي مېکانېزم د سمدستي عملي کولو او تمویل د جوړښتي جنسیتي ظلمونو د حل لپاره د هغو د پرمختګ په ګډون د بشریت ضد جرمونو په اړه د راتلونکي تړون په چوکاټ کې د جنسیتي نژادي تبعیض مفکورې شاملولو او د روانو بحرانونو د پایلو د کمولو لپاره افغانستان ته د مرستو د زیاتولو غوښتنه وکړه.»
د ښځینه خبریالانو د حق غوښتنې کمېتې د افغان رسنیو د ملاتړ سازمان کې د ملګرو ملتونو له خوا د ښځو په ځانګړې توګه د ښځینه خبریالانو د ساتنې او د رسنیو د آزادۍ د سرغړونو د حساب ورکولو د ډاډمنولو لپاره د همغږۍ او عملي اقداماتو غوښټنه وکړه.
د ملګرو ملتونو د بشري حقونو شورا په ۶۱ مه غونډه کې، چې تېره ورځ تر سره شوې، د افغانستان د بشري حقونو وضعیت ارزول شوی او د بشري حقونو د عالي کمېشنرۍ او د افغانستان د بشري حقونو لپاره د ملګرو ملتونو د ځانګړي راپور ورکوونکي راپورونه هم په کې وړاندې شول.
