په «جلاوطنۍ کې دخپلواکو ښځو» اعتراضي غورڅنګ د ښځو د پیستون نړیوالې ورځې په درشل کې وايي، هغه څه چې نن پر افغان ښځو تېرېږي، یو داخلي بحران نه، بلکې یو انساني بشري ناورین دی، چې نړیوال اړخونه لري.
رخشانه: د دې غورځنګ غړو نن (سه شنبه د کب ۱۲ مه) پاکستان کې د یوې اعتراضي غونډې پر مهال د مارچ اتمه د خپلواکۍ، عدالت، برابرۍ او انساني کرامت لپاره د ښځو د تاریخي مبارزې سمبول وبلله.
د دې غورځنګ په اعلامیه کې راغلي، د مارچ اتمه د هغو ښځو د ځلېدا ورځ ده، چې د جوړښتي تبعیض، سیستماتیک تاوتریخوالي او ټولنیز جلاوالي په وړاندې ولاړې دي او د محرومیت، بند، جلاوطنۍ او د خپلو زوندونو سره یې د خپلواکۍ بیه پرې کړې ده.
معترضو ښخو د ښځو او نجونو په وړاندې د طالبانو تاوتریخوالي ته په اشارې وايي «افغان ښځې د خپل تاریخ په تر ټولو تیاره دوره کې ژوند کوي.»
د دوی په وینا، د افغان ښځو او نجونو په وړاندې د طالبانو محدودیتونه «د بشر د اساسي حقونو ستره سرغړونه ده. څه چې نن پر افغان ښځو تېرېږي، دا نه یوازې یو داخلي بحران، بلکې یو انسانۍ ناورین دی، چې نړیوال اړخونه لري.»
دوی زیاته کړې «نړیواله ټولنه، د انسانۍ کرامت دفاع او له تبعیض او جنسیتي توپیر څخه مخنیوي مکلفه ده.»
معترضو ښخو، چوپتیا، بې عملي او د اوسني وضعیت عادي کول د قانوني مکلفیتونو څخه سرغړونه او د بې عدالتۍ په دوام کې غیر مستقیم ګډون وباله.
هغوی، له ملګرو ملتونو، د بشري حقونو له شورا، د هاګ نړیوالې محکمې او نړیوالو بشري حقونو له بنسټونو په افغانستان کې د جنسیتي توپیر د په رسمیت پېژندنې غوښتنه وکړه وايي، چې هغه دې د بشریت په وړاندې د جنایت په توګه تر حقوقي څېړنې لاندې ونیسي.
معترضو مېرمنو همدارنګه له ملګرو ملتونو، د بشري حقونو له شورا او نړیوالو بشري حقونو له بنسټونو وغوښتل، چې «د ښځو د حقونو د منظم سرغړونو د حساب ورکولو او محاکمې کړنلارې فعالې کړي.»
د دې غورځنګ غړو «له طالبانو سره هر ډول سیاسي او اقتصادي تعامل د ښځو حقونو ته د عملي او تایید وړ درناوي» پورې مشروط ګڼلی دی او د هېواد د ننه او بهر کې یې د افغان ښځو د لاریونونو د ملاتړ غوښتنه کړې ده.
په جلاوطنۍ کې د خپلواکو ښځو غورځنګ غړو ټینګار کړی، چې «د بې عدالتۍ په وړاندې چوپتیا د ظلم دوام ته لار هواروي.» دوی د هېواد له وګړو غوښتي، چې د هېواد د راتلونکې لپاره خپل تاریخي مسوولیت ادا او د افغانستان د ښځو سره ودرېږي.
