د خوړو نړیوال پروګرام (WFP) په افغانستان کې د سختې لوږې خبرداری ورکړی وايي، دا مهال له هرو څلورو ماشومانو، درې تنه چې د شدیدې خوارځواکۍ لپاره د ژوند ژغورنې درملنې ته اړتیا لري، ردوي.
رخشانه: دې بنسټ نن (چهارشنبې د کب ۱۳ مه) په خپله اېکس پاڼه د یوې ویډیو په خپرولو سره لیکلي، د طالبانو او پاکستان تر منځ نښتو او د ایران جګړې د لوږې ناورین لا زیات کړی دی.
په افغانستان کې د خوړو نړیوال پروګرام سیمه ییز استازي جان آیلیف ویلي، د افغانستان په خپلو پولو کې ناآمنۍ شاهد دی، له پاکستان سره په ختیځو او جنوبي پولو جګړې زیاتې شوې او په ایران کې هم تاوتریخوالی دوام لري.
هغه زیاته کړې: «د جګړو دا تازه لړۍ پر هغو ټولنو سخت دروند فشار واردوي، چې له وړاندې بحراني کلونو، جنګ او بې ثباتۍ له آمله زیانمن او سولېدلي دي.»
آیلیف په ختیځو او جنوبي ولایتونو کې د طالبانو او پاکستان تر منځ جګړو ته په اشارې ویلي، د خوړو نړیوال پروګرام اړ شو، چې په لنډ مهالې توګه، بېړني فعالیونه، ټولنیز ملاتړ، د ښوونځیو تغذیه او د استوګنې پروګرامونه ودروي.
د هغه په وینا، په جګړو ځپلو ولایتونو کې د خوارکي توکو د بېړنۍ مرستو د وېش د ځنډېدو له آمله، شاوخوا ۱۶۰ زره کسان اغېزمن شوي دي.
د ملګرو ملتونو دې چارواکي، په ایران کې جګړې او له دې هېواده د کډوالو راستنېدو ته په اشارې زیاته کړې، دوی د ډېری هغو لپاره افغانستان ته راستنېدل، نه یوازې د بېوزلۍ، بېکارۍ او لوږې سره، بلکې له بیا بې ثباتۍ سره هم مخ کېدل دي.
د ملګرو ملتونو د خوړو نړیوال پروګرام ویلي، دوی په ۲۰۲۵ میلادي کال کې د ایران او پاکستان په پولو د نیم میلیون راستنېدونکو څخه د نغدو پیسو، غني شویو بسکوټو او د ښځو او ماشومانو لپاره د مغذي خوړو محصولاتو په وېشلو سره ملاتړ کړی دی.
دې بنسټ زیاته کړې، په ۲۰۲۵ کال کې له ایران او پاکستان څخه له ۲.۵ میلیونه زیات کډوال راستانه شوي او وړاندوینه کېږي، چې روان میلادي کال به ډېری کډوال له ایران او پاکستان څخه خپل هېواد ته راستانه شي.
د خوړولو نړیوال پروګرام خبرداری ورکړی، چې افغانستان د نړۍ یو له سختې لوږې ناورین سره مخ دی او کابو ۱۷.۴ میلیونه وګړي د خوړو بېړنۍ مرستې ته اړتیا لري.
د دې بنسټ په وینا، په افغانستان کې د ماشومانو تغذیه هم اندېښمنوونکې کچې ته رسېدلې او آتکل کېږي، چې په ۲۰۲۶ کال کې به ۳.۷ میلیونه ماشومان درملنې ته اړتیا ولري.
دې بنسټ ویلي، د نوي بحران په رامنځ ته کېدو او د بودیجې اوسني وضعیت ته په کتو، ښايي ونه توانېږي، له هغه کورنیو سره چې له ایران او پاکستان څخه راستنېږي، مرسته وکړي.
د خوړو نړیوال پروګرام خبرداری ورکړی، چې د ۲۰۲۶ میلادي کال تر اپرېل میاشتې پورې ښايي د دوی د بېړنیو عملیاتو بودیجه پای ته ورسېږي او له ګواښ سره مخ میلیونونه وګړي حیاتي ملاتړ له لاسه ورکړي.
د خوړو نړیوال پروګرام د راتلونکو شپږو میاشتو لپاره ۳۱۳ میلیون ډالرو مالي ملاتړ ته اړتیا لري. دا بنسټ له نړیوالې ټولنې غواړي، چې په خپلو ژمنو عمل وکړي او افغانستان د اړتیا په دې سخت وخت کې یوازې پرېنږدي.
