طالبانو روانه اوونۍ په بلخ، خوست، بامیان، کابل، بغلان، هرات او اروزګان ولایتونو کې د یوې ښځې په ګډون ۳۸ تنه د بېلا بېلو تورونو پر اساس د خلکو په وړاندې په دورو وهلي دي.
رخشانه: دغه کسان، د نشه کوونکو ګولیو او الکولي موادو د پېر او پلور، له واده بهر جنسي اړیکې، لواطت، نامشروع اړیکې، غلا، اخلاقي فساد، په حریم تېري او د یوې کوژدنې شوې نجلۍ د تښتونې په تورونو په دې اوو ولایتونو کې په دورو وهل شوي دي.
شنبې د (کب ۹ مه) بلخ کې درې تنه د الکولي موادو د پلور په تور ۳۹ دورې وهل شوي، خو معلومه نه ده، چې څومره موده بند سزا ورته اورول شوې.
یکشنبې د (کب ۱۰مه) د خوست تڼیو ولسوالۍ کې اته تنه، د لواطت، غلا او اخلاقي فساد په تور د خلکو په وړاندې ۳۹ دورې و وهل شول او له یوه تر پنځو کلونو په تنفذي بند محکوم شول.
سه شنبې د (کب ۱۲ مه) بامیان او کابل کې ۱۸ تنه د غلا، الکولي مشروباتو او نشه کوونکو ګولیو د پېر، پلور او قاچاق په تور په دورو وهل شوي دي.
د بامیان ولایت مرکز کې یو تن د غلا په تور ۳۵ دوهرې وهل شوی او یو کال بند باندې محکوم شوی دی.
۱۷ تنه بیا کابل کې د الکولي مشروباتو او نشه کوونکو ګولیو د پېر، پلور او قاچاق په تور له ۱۰ تر ۳۹ دورو وهل شوي دي.
دغه کسان د محکمې د پرېکړې پر اساس له اوو تر ننه میاشتو پورې تنفذي بند باندې هم محکوم شوي دي.
چهارشنبې د (کب ۱۳ مه) د یوې ښځې په ګډون اووه تنه د لواطت، له واده بهر اړیکې، پر حریم د تېري، د نامشروع اړیکې لرو، غلا او د یوې کوژنې نجلۍ تښتولو په تور په بلخ، بغلان، هرات او ارزوګان ولایتونو کې په دورو وهل شوي دي.
یو تن د لواطت په تور بلخ ولایت کې ۳۵ دورې وهل شوی خو معلومه نه ده، چې په څومره بند محکوم شوی دی.
دوه تنه له واده بهر اړیکې او په حریم د تېري په تور بغلان ښار کې ۳۹ دورې وهل شوي او په دې کاله تنفذي بند محکوم شوي دي.
د یوې ښځې په ګډون درې تنه د نامشروع اړیکې او غلا په تور د هرات کهسان ولسوالۍ کې ۳۹ دورې وهل شوي او له شپږ تر ۹ میاشتې په تنفذي بند محکوم شوي.
یو تن بیا د یوې کوژدن شوې نجلۍ د تښتولو په تور اروزګان کې ۳۹ دورې وهل شوی او په دوه کاله او شپږ میاشتې تنفذي بند محکوم شوی دی.
پنشنبې د (کب ۱۴ مه) دوه تنه د لواطت په تور د بغلان نهرین ولسوالۍ کې د خلکو په وړاندې له ۱۵ تر ۲۰ دورو وهل شوي او په یوه کال تنفذي بند محکوم شوي دي.
