غزني کې د طالبانو د والي رسنیز دفتر اعلان وکړ، چې دغه ولایت کې یې د «خوشحال» په نوم د یوې سیمه ییزې راډیو خپرونې بندې کړې.
رخشانه: د دې سیمه ییزې راډیو خپرونې نن (چهارشنبې د کب ۱۳ مه) د دیني ارزښتونو خلاف خپرونو له امله بندې شوې دي.
غزني کې د طالبانو د والي رسنیز دفتر لیکلي، د دې راډیو خپرونې، له دیني، کلتوري او ټولنیزو ارزښتونو څخه د سرغړاوي په تور بندې شوې او د هغې فعالیت ځنډول شوی دی.
دا په داسې حال کې ده، چې طالبانو د روانې اوونۍ په اوږدو کې کابل کې د راه فردا خصوصي تلوېزیون خپرونې هم بندې او د دې رنۍ د امتیاز خاوند محمد محقق ملکیت او مالونه یې مصادره کړي وو.
طالبانو د دې رسنۍ خپرونې له پاکستان سره د طالبانو د نښتو په وړاندې د محمد محقق د وروستي غبرګون له امله بندې کړې دي.
تر اوسه د دې انځوریځې رسنۍ د نشراتو د بیا پیل معلومات په لاس کې نشته.
طالبان په تېرو څه باندې څلورنو کلونو کې د رسنیو په وړاندې د محدودیتونو په لګولو سره د څو رسنیو د فعالیت د بندېدو لامل شوي دي.
دې ډلې په یاده موده کې لسګونه خبریالان، د رسنیو فعالان او کارکوونکي نیولي او څو تنه یې زنداني کړي دي.
