د «افغان ښځو د سیاسي ګډون شبکې» اعتراضي غورځنګ غړو د مارچ اتمه، د ښځو د پیوستون نړیوالې ورځې په درشل کې ویلي، دا ورځ د افغان ښځو او نجونو د محرومیت او مقاومت د یادولو ورځ ده.
رخشانه: د دې غورځنګ غړو، پرون جمعه (د کب ۱۵ مه) په یوه بیانیه کې لیکلي، دا ورځ د ښځو مقام د درناوي او د برابرۍ، عدالت او انساني کرامت لپاره د ښځو د تاریخي مباروزو د یادولو ورځ ده.
په بیانه کې یې راغلي دا ورځ د ښځو د نړیوال پیوستون سمبول دی، چې د آزادۍ، زده کړې، سیاسي ګډون او له عزته ډک ژوند لپاره یې مبارزه کړې ده.
معترضو مېرمنو ویلي، افغانستان کې د مارچ اتمه نه یوازې نه یوازې یو سمبولیک مناسبت نه دی، بلکې په دې هېواد کې د ښځو د څلورنیمو کلونو، محرومیت او مقاومت درد دی.
دوی پر دوام وايي، د طالبانو تر واک لاندې افغانستان کې ښځې له تر ټولو پراخو او منظمو محدودیتونو سره مخ او له خپلو انساني حقونو محرومې کړای شوې دي.
معترضو ښځو په افغانستان کې د ښځو او نجونو په وړاندې محدودیتونه د هغه «جنسیتي توپير» ښکاره بېلګه وبلله، چې نیمه ټولنه یې له اساسي او انساني حقونو محرومه کړې ده.
که څه هم په تېرو څه باندې څلورو کلونو کې د بشري حقونو سازمانونو، د ښځو د حقونو فعالانو او نړیوالې ټولنې په پرلپسې ډول د طالبانو له لوري د لګول شویو محدودیتونو د لغوه کېدو غوښتنه کړې، خو دغې ډلې تر اوسه یو محدودیت هم نه دی لغوه کړی.
